Биыл Павлодар өңірі бойынша 64 шақырым жол жөндеуден өтеді
«Қазақстан теміржолшысы» газетінің тілшісі
Қазір жазғы жол жұмыстарының қызған кезі. Әсіресе, елдің солтүстік және шығыс өңірлері бұл қысқа мерзімнің әр күнін, әр сағатын тиімді пайдаланып қалуға тырысады. Оның жарқын көрінісін Павлодар өңірінде жүріп жатқан қауырт жұмыстан көруге болады.
Биыл аталған өңірдің 64 км шамасындағы темір жолы күрделі жөндеу көрмек. Таратып айтар болсақ, Сарыоба-Еркіншілік аралығында 18,6 км жол, Қоржынкөл-Ерейментау аралығында 14,379 км, сондай-ақ, Көктөбе-Жұмыскер аралығында 19,4 км және Көктөбе-Құркөл аралығында 11,3 км жол күрделі жөндеуден өтіп, жаңа келбетке ие болмақ. Бұдан бөлек, Павлодар НЖС бойынша 27 км шамасында жолды күшейтілген күрделі жөндеуден өткізу қарастырылған. Бұл жөндеу түрі Еңбекшілдер-Айсары және Ақсу станциясында жүргізілмек.
– «ҚТЖ» ұлттық компаниясы теміржолдың инфрақұрылы- мын жаңғырту және жетілдіру бағытында тұрақты жұмыстар жүргізіп келеді. Биыл да Компания желісі бойынша 551 км жол күрделі жөндеуден өтпек. Соның 64 шақырымы Павлодар магистральдық желі бөлімшесі аумағында өтпек. Қазіргі уақытта Сарыоба – Еркіншілік аралығында 18,6 км жол көлеміне жүргізіліп жатқан күрделі жөндеу, сондай-ақ, Еңбекшілдер-Айсары аралығындағы 22,8 км жол көлеміне күшейтілген орта жөндеу аяқталып қалды. Сонымен қатар Қоржынкөл-Ерейментау аралығындағы 14,379 км жол көлемінде күрделі жөндеу басталды, қазір 7,6 км жолға жаңа рельсшпалды торкөз салынды. Жалпы жол жұмыстары кестеге сай жүргізіліп жатыр, – деп ақпарат берді Павлодар магистральдық желі бөлімшесінің қызметкері Асхат Ақаев.