Доссор вокзалына перрон салынбақ
Атырау облысы бойынша меншікті тілші
ҚР Парламенті мәжілісінің депутаты Сәлімжан Нақпаев жуырда Мақат ауданында болып, халықпен кездесуінде теміржолшылар Доссор вокзалына перрон салу мәселесін көтерген болатын, деп хабарлайды Rail-news.kz.
Бұл – көптен айтылып келе жатса да, шешімін таппай отырған жайт. Әсіресе, пойыздан түскен үлкен кісілер мен балаларға қиын, биік вагоннан жерге секіріп түсуге мәжбүр. Тозығы жетіп тұрған теміржол вокзалының перронын жаңғырту депутат назарынан тыс қалмаған, биылғы жылы Доссорға жаңа перрон салынатынын айтты. Айтуынша, жобаға сәйкес, перрон 1,2 метрге көтеріледі және 60 метр шатырмен жабылмақ. Перрон ұзындығы – 448,8 м, ал ені – 4 м. Барлық аумағы – 4150 м².
Сондай-ақ перрон аумағында желілік полиция бөлімі, демалыс бөлмесі, кафе, жүк қоймасы мен әжетхана орналасатын шағын ғимарат салу да қарастырылады екен. Сонымен қатар, жобада аумақты LED шамдарымен жабдықтап, жолаушылар ыңғайлылығы үшін отырғыштар мен қоқыс жәшіктерін қою, тағы басқа қажеттіліктер ескеріледі.