Биыл ұзындығы 1 401 шақырым темір жол жөнделеді
«Қазақстан теміржолшысы» газетінің тілшісі
2025 – «Қазақстан темір жолы» ұлттық компаниясы үшін маңызды жыл болмақ. Бірқатар жобалар құрылысы аяқталып, енді бірқатары жаңадан басталады.
Қазақстан Республикасының 2030 жылға дейінгі көліктік-логистикалық әлеуетін дамыту тұжырымдамасын іске асыру жөніндегі іс-қимыл жоспарына енгізілген жұмыстар легі қатарында биыл Маңғыстау станциясын дамыту және №2,10,12,15 разъездерінде қосымша жолдар салу көзделіп отыр. Бұл – қолданыстағы теміржол инфрақұрылымының өткізу қабілетін арттыру жөніндегі жұмыстар шеңберінде атқарылады.
Сонымен қатар еліміздің мультимодальды әлеуетін дамытуға бағытталған «Достық-Мойынты» учаскесінде екінші теміржол жолын салу, қолданыстағы «Семей-Ақтоғай» теміржол учаскесіне шыға отырып, Қазақстан – Қытай шекарасында «Бақты» үшінші шекаралық теміржол өткелін салу, Алматы теміржол торабын айналып өтетін айналма теміржол құрылысын салу, «Дарбаза-Мақтаарал» теміржол желісін салу жобалары жоспарға сәйкес аяқталады деп күтілуде. Құрылыс аяқталғаннан кейін қосымша жұмыс орындары құрылмақ, бір ғана жол шаруашылығы бойынша жаңа құрылыс учаскелеріне 500-ден астам адамды қабылдау жоспарлануда.
Бұдан бөлек, ұзындығы 1 401 км темір жолдарды жөндеу, оның ішінде 566 шақырым жолға күрделі жөндеу жүргізу жоспарлануда. Бейнеу – Маңғыстау учаскесінде жұмыстар басталады. Маңғыстау – Құрық учаскесінде автоблоктау құрылысы және рзд.Р – Боржақты учаскесінде разъезд құрылысы басталады.