Инфрақұрылым және тариф саясаты
«Қазақстан теміржолшысы» газетінің тілшісі
«ҚТЖ» ҰК» АҚ-ның 2026-2030 жылдарға арналған магистральдық теміржол желілері мен кіреберіс жолдар бойынша реттелетін қызметтерге тариф сметасы мен тарифін бекіту туралы өтінімді қарау жөнінде қоғамдық тыңдау өтті.
Жиынға ҚТЖ және ҚР Ұлттық экономика министрлігінің табиғи монополияларды реттеу бойынша комитетінің өкілдері, тұтынушылар және басқа құзырлы тұлғалар қатысты. «ҚТЖ» ҰК» АҚ Тариф саясаты департаментінің директоры Диас Түсіпбеков аталған өтінім аясында қарастырылатын қызмет түрлері туралы мәлімдеді. Сонымен қатар теміржол инфрақұрылымының техникалық сипаттамасына және 2021- 2025 жылдары атқарылған жұмыстар нәтижесіне тоқталды.
– Көрсетілетін қызметтер сапасын арттыру мақсатында компания 2023-2029 жылдарға арналған теміржол желісі нысандарын дамыту бағдарламасын жүзеге асыруда. Ол бағдарлама ірі инфрақұрылымдық жобаларды жүзеге асыру есебімен өткізу қабілетін арттыруға, желідегі «тар орындарды» жоюға, жұмысшылардың еңбегін қорғау және пойыздар қозғалысы қауіпсіздігін қамтамасыз етуге бағытталған, – деген Д.Түсіпбеков жаңадан салынған және қазіргі таңда құрылысы жүріп жатқан темір жолдар туралы ақпарат берді.
2021-2025 жылдары ҚТЖ-да 4365 км жол жөнделіп, 6 көпірге күрделі жөндеу жүргізілген, 3189 бағыттама бұрмасының жиынтығы ауыстырылған. Ірілі-ұсақты 5 мыңға жуық техникалар алынған. 4 стан цияда өткізу қабілетін арттыру бойынша жұмыстар аяқталған. 18 станцияда 30 жол қалпына келтірілген. Спикердің айтуынша, 2024 жылдың қорытындысы бойынша жүк айналымының 72 пайызы өзіндік құннан төмен бағаға тасымалданады. Жалпы Қазақстанда теміржол тасымалының тарифі ең төмен. Ол сондай-ақ 2026-2030 жылдарға арналған инвестициялық бағдарламалар жобасы туралы да баяндады.
Ал ҚТЖ Магистральдық желі дирекциясы экономика жөніндегі атқарушы директоры Ерлан Қизатов кіреберіс жолдар тарифі туралы ақпараттар берді. Оның айтуынша, қазіргі таңда жылжымалы құрам үшін кіреберіс жолдар қызметін ұсыну тарифі биыл 211,74 теңге вагон-км-ді құрайды. Ал кіреберіс жолдарда маневрлік жұмыстар, түсіріп, тиеу, басқа да тасымал процестері операцияларына тариф 70,67 теңге/вагон-сағатты құрайды.
– Компания филиалдарының балансында 53 станцияда 166 кіреберіс жол бар. 2026-2030 жылдары инвестициялық бағдарламалар жобасы аясында осы жолдардың ішінде 4,713 км жолға күшейтілген орташа жөндеу жүргізіледі. Компания жұмыс тиімділігін арттыру және кіреберіс жолдардың тозу деңгейін азайтуға арналған инвестициялық бағдарламаларды жүзеге асыруды жалғастырады. Қаржы сондай-ақ қолданыстағы кіреберіс жолдардың техникалық жағдайын қамтамасыз ететін ағымдағы пайдалану шығындарына да бағытталады. Сонымен қатар тұтынушыларға сапалы әрі дер кезінде қызмет көрсету жұмыстары жалғасын табады. Осылайша ұсынылатын іс-шаралар арқылы ұзақмерзімді перспективада кіреберіс жолдар жұмысының тұрақтылығы, қауіпсіздігі, сенімділігі қамтамасыз етіледі, – деді Е.Қизатов.
Жиынға онлайн қатысқан жеке жүк жөнелтуші компаниялардың өкілдері тақырып аясында өздерін толғандырған мәселелер бойынша сұрақтарын қойды.