«Бақты-Аягөз» құрылысы талқыланды
Абай облысы бойынша меншікті тілші
Президент тапсырмасы аясында жүзеге асырылып жатқан стратегиялық маңызы жоғары «Бақты-Аягөз» теміржолының құрылысы қарқын алуда. Жуырда Абай облысы әкімдігінде «ҚТЖ» ҰК» АҚ, «Самұрық-Қазына» АҚ өкілдері, бас мердігер China Harbour Engineering Company Ltd. компаниясы, ҚР Көлік вице-министрі Жәнібек Тайжанов және жобалаушы ұйым өкілдері қатысқан жиында жаңа жобаны іске асыру мәселелері кеңінен талқыланды.
Кеңеске Семей ЖТ бөлімшесі басшысы Алмас Сейсемқанов пен Семей магистральдық желі бөлімшесі директоры Айдын Шәукежанов та қатысты.
Жергілікті компанияларды қосалқы мердігер ретінде құрылыс жұмыстарына тарту, жобаның аяқталу мерзімі және өзге де бірқатар өзекті мәселелер талқыланған басқосуда осыған дейінгі атқарылған жұмыстарға есеп те берілді. Атап айтсақ, бүгінгі күнге дейін инженерлік іздестіру жұмыстары толығымен аяқталып, желі бойындағы Ай, Шолпан, Үржар және Бақты учаскелерінде төрт вахталық қалашық салынған. Жиын барысында жобаның іске асырылу барысы, сондай-ақ жобаға қатысушы барлық тараптардың жұмысын өзара үйлестіру мәселелері сөз болды.
Сондай-ақ аталған жобаны жүзеге асыру бойынша барлық бағыттағы жұмыстарды жеделдету жөнінде нақты тапсырмалар берілді. Көлік вице-министрі Жәнібек Тайжанов жобаны белгіленген мерзімде іске асырудың маңыздылығын атап өтіп, құрылысқа қатысушы барлық тараптың тиімді әрі үйлесімді жұмыс істеуі қажет екенін де баса атап өтті. Көлік министрлігі жобаның іске асырылуын «Қазақстан темір жолы» ҰК» АҚ, мердігер ұйымдар және жергілікті атқарушы органдармен бірлесіп тұрақты түрде бақылауда ұстап отыр. Құрылысты алдағы 2027 жылдың соңына дейін толық аяқтау жоспарланған.
Айта кетсек, «Бақты-Аягөз» жобасы елдің көлік инфрақұрылымын дамыту және Транскаспий бағытындағы трансқазақстандық теміржол дәлізін қалыптастыру тұрғысынан аса жоғары стратегиялық маңызға ие.
Жаңа құрылыстың жүргізілу барысы жергілікті Семей филиалының да назарында тұр. Осыған дейін «ҚТЖ» ҰК» АҚның Жаңа жобалар жөніндегі басқарушы директоры Илья Мещеряков Абай облысына жасаған сапарында Семей магистральдық желі бөлімшесінің басшысы Айдын Шәукежанов және атқарушы билік өкілдері бастаған арнайы топпен бірге болашақ желінің бойында болып, атқарылған жұмыстар барысын пысықтап қайтқан болатын.