Экспорт артады
Ақтөбе облысы бойынша меншікті тілші
Қазақстандық рельске сұраныс жоғары болып тұр. «Ақтөбе рельс арқалық зауыты» ЖШС алдағы уақытта экспортты еселемек.
Негізгі жолдың дәнекерленген бөліктерінің ұзақтығын арттыратын өнімдер шетелдіктердің қызығушылығы мен сұранысын арттыруда. Халықаралық стандарттарға сай зауыт өнімі қазірдің өзінде Өзбекстан, Тәжікстан, Беларусь, Грузия, Түркіменстан, Ресей Федерациясы, Эстония және Иран елдеріне экспортталады. Компания енді өз өнімін Украинаға да жөнелтеді. Еуразиялық экономикалық одақ аумағында Р-65 стандартына сәйкес, ыстыққа бейімделген 120 метрлік рельстер шығаратын кәсіпорын украиналықтардың де сенімінен шыққан.
«Ақтөбе рельс-арқалық зауыты» ЖШС ДСТУ 4344:2004 бойынша шығарылған 1 санатты Р65 типті рельс өндірісін игерді. Осы жұмыстардың нәтижесінде биыл наурыз айында сәйкестік сертификаты алынды. Оның болуы Украина аумағында рельстік өнімді сатуға қажетті шарт болып табылады. Бұл өз кезегінде кәсіпорынның ғана емес, Қазақстан Республикасының экспорттық әлеуетін арттыруға ықпал етеді», – деп хабарлайды компанияның ресми сайты.
Ішкі нарықта да зауыт өнімі жоғары сұранысқа ие. Зауыт өнімінің Қазақстандағы ең ірі тұтынушысы болып табылатын «Қазақстан темір жолы» ҰК» АҚ жоғары жылдамдықты магистральдарда қолданылатын кең жолақты жолдарды салуға лайықталған рельсті теміржол құрылысы мен жөндеу жұмыстарына пайдаланады.