Таразда Президент Жолдауынан туған міндеттерді талқылады
Тараз теміржол көлігі және коммуникация колледжінің ұжымы Президент Жолдауынан туған міндеттерді талқылап, тапсырмаларды пысықтады.
Биылғы 2 қыркүйек мемлекетіміздің ең маңызды күндердің бірі ретінде тарихта қалатыны белгілі. Бұл жаңадан сайланған Президенттің алғашқы Жолдауы болғандықтан, ел арасында қызығушылық тудырғаны рас. Бұл Жолдаудың басқа құжаттардан негізгі ерекшелігі ретінде мемлекеттің экономикаға көзқарасының түбегейлі өзгеруін атап өтуге болады.
Мемлекет басшысы Қасым-Жомарт Тоқаевтың алғашқы Жолдауы қоғамды толғандырған мәселелердің бәріне дерлік жауап берді. Президент мемлекетті нығайту, отандық бизнесті қолдау, халықты әлеуметтік қорғау және экономиканы дамыту мәселелеріне тоқталды. Негізгі мәлімдеме болашақ азаматтық қоғам жөнінде болды. Жолдауда азаматтардың барлық сындарлы өтініш-тілектерін жедел әрі тиімді қарастыратын «Халық үніне құлақ асатын мемлекет» тұжырымдамасын іске асыру міндеті қойылды. Мемлекет басшысы жеріміздің шетелдіктерге сатылмайтынын айтты. «Біз оған жол бермейміз. Бұл мәселе бойынша қауесет таратуды доғару керек», – деді Қ.Тоқаев.
Кәсіпкерлер өтінген тағы бір шешім – 5 пайыздық қосымша зейнетақы төлемін енгізу мәселесі 2023 жылға дейін шегерілді. Осы уақыт ішінде ортақ шешім табу қажет. «Зейнеткерлікті қамтамасыз ету мәселесінде тағы бір жаңалық: Мемлекет басшысы Үкіметке жыл соңына дейін жұмыс істейтін азаматтардың зейнетақы жинағының бір бөлігін мақсатты түрде пайдалануына қатысты, мысалы, баспана сатып алу немесе білім алу үшін жұмсау мәселесін жыл соңына дейін пысықтауды тапсырды.
«Жолдау мемлекетіміздегі әлеуметтік ахуалды жақсарту жөніндегі іс-қимылдардың нақты жоспарына айналатыны сөзсіз. Сондықтан ол көптің көңілінен шығып отыр, қолдаушылар көп», – деп тұжырым жасады жиынға қатысушылар.