Маңғыстау ЖТ бөлімшесі кәсіподағының басшысы ҚР Президентінің бастамасына үн қосты
Жыл басы ел арасындағы ереуіл-дүмпулермен басталғанын жасыра алмаймыз. Газ бағасының күрт қымбаттап кетуіне орай Жаңаөзеннен басталған бейбіт шерулер басқа өңірлерді де шарпып, өкінішке орай, оны өз мақсатына пайдалануға ұмтылған зұлым күштердің әрекеті адам шығынына әкеліп, қалың елдің қабырғасын қайыстырды. Жаңаөзен мәселесіне Мемлекет басшысы араласып, Үкімет комиссия құрып, уақытында мәмлеге келе білді.
Елдегі орын алған жағдайға байланысты Мемлекет басшысы Қасым-Жомарт Тоқаевтың Қазақстан Республикасы Парламенті Мәжілісінің отырысында сөйлеген сөзінде тәуелсіздік тарихында алғаш рет аса күрделі кезеңге тап болғанымызды, осындай сынақты қайыспай біртұтас ел болып еңсере білгендігімізді жеткізді. Ең алдымен еліміздің жаңа экономикалық тұғырын қалыптастыруды мықтап қолға алу қажеттігін, еліміздің стратегиялық активтерін басқарып отырған «Самұрық-Қазына» қорының жұмысын жандандыру жөнінде, экономиканы әртараптандыру арқылы еліміздің әл-ауқатын арттыру, тұрақты жұмыс орындарын ашу мүмкіндігі, сондай-ақ, 2025 жылға дейін инфляцияны 3-4 пайыздан асырмау туралы тапсырмалары көптің көңілінен шығып, алдағы күнге деген үміт отын маздатқаны жасырын емес.
Әсіресе, жастарды жұмыспен қамту, шағын және орта бизнесті, кәсіпкерлікті одан әрі қолдау, дамыту, 2025 жылға дейін халықаралық деңгейдегі 5 техникалық жоғары оқу орнын ашу, оның екеуін батыс өңірден ашу, қарулы күштерімізді қайта даярлау, құқық қорғау орындары мен Қорғаныс саласын реформалау, діни экстремизге тыйым салу, кеден саласын реттеу, ауылшаруашылығына баса назар аудару, ұстаздар үшін жаңа бағдарлама әзірлеу, мемлекеттік басқару саласын реформалау, мемлекеттік органдар қызметкерлерінің халықпен байланысын арттырып, бюрократия мен қағазбастылықты жою жайлы міндеттемелері ел үшін ең басты қажеттіліктер болатын. Осы орайда Мемлекет басшысының халық үшін қолға алуға тиісті қадау-қадау тапсырмалары мен жалпақ жұртшылыққа жеткізген міндеттерін мыңдаған қазақстандықтар қатарында қуаттап қолдаймын.
Әзірбай ТҰРМАҒАМБЕТОВ, Маңғыстау жүк тасымалы бөлімшесі кәсіподақ комитетінің төрағасы