Референдум: ел ертеңі үшін маңызды қадам

Еліміздің Парламент мәжілісінің депутаттары Амангелді Бердалин, Ғалымжан Елеуов және «Аманат» партиясының Ақтөбе облыстық филиалы төрағасының бірінші орынбасары Ербол Данағұлов теміржолшылармен кездесті, деп хабарлайды Rail-news.kz.

Бүкілхалықтық референдум өткізу жөніндегі республикалық қоғамдық штаб өкілдері теміржолшыларға Ата Заңға енгізілетін өзгерістер мен түзетулер туралы айттып берді. Депутаттар ел ертеңі үшін маңызды қадам болғалы отырғаншараға белсенді қатысуға және конституциялық өзгерістер үшін дауыс беруге шақырды.

«Соңғы 27 жыл ішінде Конституцияға төрт рет түзетулер енгізілді. Олардың барлығын Парламент қабылдады. Ертең өтетін референдум өзгеше. Ендігі түзетулер ел азаматтарының барлығы, Қазақстан халқының дауыс беруімен енгізіледі. Сондықтан ел болашағын ойлайтын әр азамат өз таңдауын жасауы керек», – деді мәжіліс депутаты Амангелді Бердалин.

Конститутциядағы өзгерістер еңбек ұжымына қарапайым мысалдармен түсіндірілді. Ендігі кезде Мемлекет басшысы қандай да бір облыс, не республикалық маңызы бар қала әкімі лауазымына жалғыз емес, бірнеше кандидатты баламалы негізде ұсына алатыны айтылды. Оларды облыстық немесе қалалық мәслихат депутаттары таңдайтын болады.

Кездесуде теміржолшылар ерекше белсенділік танытып, өздерін толғандырған  сауалдарын қойып, пікірлерін де білдірді. Қазақстанның болашағы, даму сатысындағы жаңа бастамалары, зейнетақы жасы, жұмысшылардың жағдайы, елдің және тіл болашағына қатысты мәселелерді көтерді. 

Теміржолшылар қаласы атанған Шалқар өңірінен шыққан Ербол Данағұлов теміржол саласының ел экономикасына қосып отырған үлесі мен маңыздылығына тоқталды. «Мемлекетіміз халықтың әл-ауқатын арттыруға жағдай жасап келеді. Кезінде Шалқардан теміржол өтетініне ешкім сенбеген. Құм далада теміржол салып, ел экономикасының шарықтауына үлес қосады деген әңгіме ертегі сияқты айтылатын. Міне, қазір сол салада өздеріңіз жүрсіздер.  Мыңдаған жүк вагондары Шалқар арқылы өтіп, жолаушылар пойызы жүйткіп жатыр. Қазір ол жердегі әр шаңырақты теміржолшы асырап отыр. 

«Нан тауып жейтін тұрақты мамандық» деп балаларын теміржолшы қылуға тырысады. Осының барлығы сіздердің еңбектеріңіз», – деді Ербол Данағұлов.