Қандыағаш жол дистанциясы қауіпсіздікті күшейтті
Ақтөбе облысы бойынша меншікті тілші
Қандыағаш жол дистанциясы жол бойын қараусыз жүрген малдан қорып, қауіпсіздік шараларын күшейтті. Жазға қарай жер аяғы кеңіп, тұрғындар төрт түліктерін бетімен қоя беретіні теміржолшыларға артық жұмыс жүктеп отыр.
Әсіресе «Қандыағаш-Жем», «Қандыағаш-Никельтау» бағыттарындағы темір жол бойы тұрақты бақылауға алынған. Соның ішінде Рзд 48, Жұрын, Ізімбет, Рзд 313, Рзд 315, Темір бекеттері қауіпті болып тұр. Осы төңіректегі елді мекендерде жеке меншік және шаруа қожалықтарының малдары көп, қараусыз жайылған төрт түлік пойыздар қозғалысына айтарлықтай қауіп төндіруде.
– Біздің жолшылар ертелі-кеш жол бойын малдан қорып, пойыздар қозғалысының қауіпсіздігін қамтамасыз етумен қатар қанша жанның ақ-адал өсіріп отырған малын да сақтап отыр деуге болады. Талай рет машинистер оқыс тежеу беріп, пойыз- дар қозғалысының кестесі бұзылғанын айтпасқа амал жоқ. Сәл кідірістің өзі аймақтағы қозғалысқа кері әсер етеді. Бірақ оны түсінетін халық жоқ болып тұр, өкінішке орай, – дейді Қандыағаш жол дистанциясының жол инженері Жадыра Еңсегенова.
Жол инженерінің айтуынша, қазір стратегиялық аумақта жайылған мал иесіне «Әкімшіліктік құқық бұзушылық» туралы Кодекстің 559-бабы 1-тармағына сәйкес 5 айлық есептік көрсеткіш көлемінде айыппұл салынатыны ескертіліп жатыр. Қазіргі уақытта жергілікті әкімшілікпен бірлесіп, темір жолға шыққан малды айдап алып келіп қамайтын қоршау салу қолға алынған. Бұл қараусыз мал мәселесін түбегейлі шешпесе де айыппұл төлеуден қашқандар төрт түлігіне ие болар деген үміт бар.