Қанға сіңген кәсібі

Астаналық белгі беру және байланыс дистанциясының радиобайланыс өндірістік телімінің бастығы, Құрметті теміржолшы Кеңесбек Сарыбаевтың өмірін өнеге ете отырып, бүтіндей бір теміржолшылар әулетінің де шежіресін толықтай шертуге болады. Сарыбаевтар династиясының ата кәсібіне беріктігіне бүгінде темірдей тәртіпке бағынған саланы әулеттің төртінші буыны таңдауы куә дер едік. Сыр өңірінен түлеген теміржолшының атасы Қабыланбек алғаш 1928 жылы жолшы болып династияның негізін салған еді. Оның ұлы, Кеңесбектің әкесі Махамбетжан болса белгі беру және байланыс саласын таңдады. Білім мен біліктілікті қажет ететін бұл кәсіпті кейіпкеріміз Кеңесбек те ерте бастан таңдап қойды. «Туғалы көзді ашып көрген, қанға сіңген кәсібіміз болған соң шығар, басқа мамандық туралы ойлап та көрген емеспін. Әрі өзім мектепте жүрген кездерде теледидар, радио секілді электроникалық құралдарды жақсы жөндейтінмін. Ақыры сол бағытпен кеттім ғой, міне», – дейді өзі. Бүгінде оның  еңбек өтілі 26 жылға жетті. Сегіз ағайынды жігіт ағасы сол бауырларының барлығы дерлік теміржолшы екенін айтады. Ал өзінің жұбайы Гүлмира да және үш ұлының екеуі – Руслан мен Ерлан да теміршолшы. Кенжесі Мирас әзірге мектепте оқиды. –Отан алдында борышымды өтеп, туған жерім Қармақшыға келген соң Қазалы белгі беру және байланыс дистанциясына монтер болып жұмысқа кірдім. Ол кезде оқымаса да жұмысқа алып, кейін оқытып алатын. Солай етіп, мені келген жылы бірден Ресейдің Воронеж қаласына 9 айлық курсқа жіберді. Оқып келгесін механик болып еңбек еттім. Сосын Жосалыда осы бағытта жұмысымды жалғастырдым. Ал 2007 жылы отбасыммен Елордамызға көшіп келген соң, мен бүгінгі еңбек етіп жатқан дистанцияның механигі болып бастап, жарты жылдан соң телім бастығына көтерілдім, – дейді теміржолшы. Жоғары білімді сырттай оқып алған ол темір жолдағы тәжірибесіне көбірек сүйенеді. Астанаға келгенде ШЧ мекемесінің радиобайланыс цехының қордаланып қалған шаруаларын демалыс көрмей, айналасындағы жігіттерін жұмылдыра жүріп атқаруы оның басшы ретіндегі жауапкершілігінің жоғары екенін  бірден байқатқан болатын. Біртіндеп бәрін ретке келтіріп, жұмысты өз арнасына түсірген телім қызметкерлері бүгінде үш цех жұмысына жауапты. Темір жолдағы қауіпсіздік, жол бойындағы, нақтырақ айтқанда, Ерейментау – Жалтыр желісі, ТҚКҚ, Астана, Қырқыншы станциялар мен №39 бекеттегі телімдер бойынша радиобайланыстың ақаусыз жұмыс істеуін үнемі қадағалап отырады. Білімін жетілдіру мақсатында соңғы жылдар ішінде Германияға Тэтра жүйесіне қатысты он күндік оқуға барып келген Кеңесбек білгендерін өз қарамағындағы 50-ге жуық механиктер мен монтерларға үйретуден танбайды. Өзінің айтуынша, осында шыңдалып еңбек еткен бірнеше маман бүгінде Ұлттық компания департаменттеріндегі қызметтерге көтеріліп кетті. Жалпы жастардың бойында білуге деген ұмтылыстың зор болуын жақсы көретін ол кезінде өзі де Серік Рзалиев, Жақсыбек Дәрібаев, марқұм Мақсұт Қонақбаев сынды тәжірибелі теміржолшылардан көп нәрсе үйренген. –Сонау өткен ғасырдың жетпісінші жылдарынан бері келе жатқан ескі техникалар да жаңаланар, жалақымыз да өсер. Тілегім еліміз тыныш, темір жолымыз үздіксіз қауіпсіз қозғалыста халыққа қызмет ете берсін, – деп қоштасты теміржолшы.

Райхан Рахметова