«Жәрдем» медпойызы Ақтөбе облысындағы жұмысын бастады

Өткен аптада «Жәрдем» медициналық пойызы Ақтөбе облысындағы жұмысын бастады. Бүгінде Байғанин ауданын бітіріп, Шалқардың алыс ауылдарында қабылдау жүріп жатыр, деп хабарлайды Rail-news.kz.

Мамандандырылған медициналық пойыздың Ақтөбе облысындағы жұмысы 29 маусымнан басталды. Жылжымалы құрам алдын ала бекітілген кестеге сәйкес Ақтөбе облысының 12 станциясына барады. 

«Біздің мақсатымыз еліміздегі сапалы медициналық қызметке қол жеткізе алмай отырған шалғайда жатқан станциялар мен оларға жақын орналасқан елдімекендердің тұрғындарын тегін медициналық тексеруден өткізу. Ақтөбе облысында 21 шілдеге дейін болып, шалғай елді-мекен тұрғындарына тегін медициналық қызмет көрсетілетін болады. Естімегендер болса хабар таратып, пойыздың кестесін де көрсетіп, халықты құлақтандыру қажет, өйткені, әр станцияда екі күннен тұрып, әрі қарай жылжып кете береміз», – дейді «Жәрдем» медициналық пойызының бас дәрігері Айнұр Егінбаева. 

Пойыз 29-30 маусым Ноғайты станциясында аялдаса, 1-2 шілде – Қарашоқатта болды, енді 3-4 шілде – Бегімбет, 5-6 шілде – Қотыртас, 7-8 шілде – Бершүгір, 9-10 шілде – Мұғалжар, 11-12 шілде Жұрын, 13-14 шілде – Ақ- кемер, 15-16 шілде – Әйтеке би, 17-18 шілде – Никельтау, 19-20 шілде – Кемпірсай, 21-22 шілде – Мәртөк станцияларында жұмыс істейді. Кесте бойынша таңғы 09.00-ден бастап кешкі 18.00-ге дейін медициналық пойыздың мамандары алыс-жақын тұрғындарды түгел қабылдайды. 

Айта кетейік, медициналық пойыздар жобасын «Самұрық-Қазына» АҚ компаниялар тобының атынан «Samruk-Kazyna Trust» әлеуметтік жобаларды дамыту қоры, ҚР Денсаулық сақтау министрлігінің қатысуымен, «Қазақстан темір жолы» ҰК АҚ жанындағы «Әлеуметтік жобалар қоры» корпоративтік қорымен бірлесіп іске асыруда. 

«Жәрдем» медициналық пойызы 23 мамырда Алматы-2 станциясынан Маңғыстауға аттанып, одан кейін Атырау облысына барды. Дәрігерлердің айтуынша, жергілікті тұрғындарда қант диабеті, омыртқаның остеохондрозы, вирустық конъюнктивит, артрит, артроз, бронх демікпесі, гастрит, панкреатит, холецистит, синусит, бронхит сияқты созылмалы аурулар жиі кездескен.