Пойызда тик-ток түсірді

№32-33 «Ақтөбе-Алматы» бағытындағы жолаушылар пойызының жолсеріктері «Балалар жылы» құрметіне жазғы лагерьден қайтып келе жатқан кішкентай жолаушыларға ерекше көңіл-күй сыйлады. Вагонда тик-ток түсірген жолсеріктер әрекеті желіде көпшіліктің ыстық ықыласына бөленді.

Батыс аймақтық жолаушылар тасымалы филиалының жолсерігі Қуаныш Жеткергенов әлеуметтік желіде танымал. Вагон жолсеріктері Қуаныш пен Қайрат Айтжановтың тик-ток түсіру ұсынысын балалар қуана қабылдаған.

«Кешегі сапарда түсірілген видео. Идея – қасымдағы әріптесім Қайрат Айтжановтыкі. Вагон ішінде Алматыдағы жазғы лагерьден келе жатқан бір топ бала болды. Пойызбен екі тәулік жол жүреді. Осы балалардың көңілін көтерейік, ұзақ жолда зерікпесін деген идеямен осындай ұсыныс жасап едік, балалардың қуанышында шек болмады. «Ура, жасайықшы...» деп шулап қоя берді. Күні бойы «қашан түсіреміз?» деп соңымыздан қалмай, қайта-қайта келеді. Балаларға әсерлілеу болсын деп видео түсіру үшін кешкі мезгілді күттік. Вагондағы барша жолаушы, үлкен кісілер де ерекше әсерленіп, қуанып, мәз болды. Әлеуметтік желіде көпшіліктің көңілінен шыққаны бізді ерекше қуантып тастады», – дейді жолсерік Қуаныш Жеткергенов.

Әлеуметтік желіні мотивация құралы ретінде пайдаланатын жолсерік жолаушыларға көтеріңкі көңіл-күй сыйлаудан жалыққан емес. Қуаныштың қазіргі уақытта әлеуметтік желіде 14 мыңнан аса оқырманы бар. Теміржол көлігі қауіпсіз, жайлы ғана емес, көңілді де екенін көрсетіп жүр.