Ақтөбеде қаламаңы пойызын іске қосу жобасы таныстырылды
Ақтөбе облысы бойынша меншікті тілші
Ақтөбеде №41 разъезд бен Жіңішке станциясы аралығына қаламаңы пойызы қатынауы мүмкін. Жаңа жобамен URBATHON AKTOBE форумы аясында облыс әкімі таныстырды.
«Ақтөбе-Экспресс» атауымен іске қосылатын жаңа пойыз қала іргесіндегі 41-ші разъезден Жіңішке станциясына дейінгі қалааралық қатынасты реттейді деп күтілуде. Облыс басшысы қаланың екі басын қосатын мұндай жобаның әлемдік тәжірибеде бар екенін түсіндірді. Әрине, жоба егжей-тегжейлі зерделеніп, кәсіби көзқарасты қажет ететінін айтты. Жобаның ұзындығы 18 шақырым, 11 аялдама, сонымен қатар 3 жаяу жүргіншілер көпірі болады. Осылайша, қаланың бір шетінен екінші шетіне дейін орта есеппен 30 минутта жетуге болады. Бұл қала орталығын біріктіріп, қатынасты жеңілдетеді.
«Біз айтып отырған жаңа жоба көп мүмкіндікке қол жеткізеді. Дегенмен үлкен жұмысты да қажет етеді. Қазір 18 шақырымдық жол қаланы екіге бөліп тұр. Теміржол айналасындағы 500 метр аумақтың бәрін жаңа жобада қарастыру керек. Қазіргі күні қалааралық теміржол қатынасы назар аударуды және жақсартуды қажет етіп тұр. Себебі көлік саясаты мен жол қауіпсіздігі бәрінен маңызды болып тұр», – деді Ақтөбе облысының әкімі Ералы Тоғжанов.
Өңір басшысының айтуынша, қазір ҚТЖ компаниясымен келісім бойынша жоба пысықталып, жан-жақты жетілдіру жұмыстары қолға алынған. Бүгінде өңірдегі теміржол қатынасы Ақтөбе қаласын екіге бөліп жатыр. Қала жылдан жылға өсіп, көлік санының өсуіне байланысты темір жол өткелдерінің бойында кептелістер де артып кеткен. Жаңа жоба Ақтөбедегі көлік ағынын жеңілдетеді деп күтілуде. Өңір басшысы теміржол учаскесінде қалалық экспресс қызметін ашу үшін темір жолдың мүмкіндіктерін пайдалану қажет деп санайды және ол қала тұрғындарының игілігіне пайдалануға бағытталатын болады.
Сондай-ақ ол жаңа жобадағы 18 шақырымдық жол бойында шағын және орта бизнесті дамытуға да мүмкіндік бар. Кәсіпорындар қазірдің өзінде өз жобаларын ұсына алады.
Облыс әкімінің айтуынша, қазіргі уақытта жоба мүмкіндіктерін дамыту үшін арнайы мамандар жұмыс істеп жатыр. Қорытындысы зерделеніп, келесі жылы жобаны сызу, құрылыс жұмыстарына қатысты қаржы көлемі мәслихатқа ұсынылады.