Ақтөбелік рельс зауыты халықаралық көрмеге қатысты
Ақтөбе облысы бойынша меншікті тілші
Германияда өткен әлемдегі ең ірі «InnoTrans 2022» көлік технологиялары көрмесіне қатысқан Ақтөбе рельс-арқалық зауытының танымалдығы арта түсті. Ірі көлік-логистикалық көрме Берлин қаласында, көрме кешенінің 42 залында көрсетілген.
Көрме «Теміржол технологиялары», «Теміржол инфрақұрылымы», «Қоғамдық көлік», «Интерьерлер» және «Тоннельдер салу» секілді бес сегментке бөлінген.
Компанияның баспасөз қызметінің хабарлауынша, халықаралық көрмеде «АРБЗ» ЖШС өнімдеріне қызығушылық танытқандар көп болған. Көптеген компаниялар рельстік өнімді сатып алу бойынша ұзақ мерзімді қарым-қатынас орнату туралы ой білдірген. Қажетті жабдықтар шығаратын фирмалармен байланыс орнатылған.
Компания оған дейін Екатеринбург қаласында өткен «ИННОПРОМ-2022» халықаралық көрмесіне қатысқан болатын. «Өнеркәсіптік ауысу: сын-қатерлерден жаңа мүмкіндіктерге» тақырыбындағы шара – Ресейде өткізілетін индустрияландыру саласындағы ірі көрмелердің бірі.
Рельс шығаратын компанияның «визиттік карточкасы» ретінде ДТ350 санатты ұзын өлшемді рельстері аталады. Олардың жоғары жылдамдықты магистральдарда, сондай-ақ жоғары жүк тасымалдау желілерінде тиімділігі дәлелденген. Сәйкесінше, рельс ұзындығының артуына байланысты жапсарлардың санын азайтуға болады. Бұл теміржол төсемін салу кезінде қаржылық шығындарды азайтып қана қоймай, теміржол құрамын да, рельстердің тозуға төзімділігін де арттырады. Нәтижесінде жолаушылар пойыздарының жүріс жатықтығына, ал жүк пойыздарының жылдамдығына қол жеткізуге болады.
Ішкі нарықта зауыт өнімдері үлкен сұранысқа ие. Қазақстан темір жолының қажетін өтеумен қатар едәуір бөлігін посткеңестік елдерге жөнелтіп отырған компания қазір Өзбекстан, Тәжікстан, Беларусь, Грузия, Түркіменстан, Ресей және Эстония елдерімен тығыз байланыс орнатқан.