Ақтөбе станциясы мұз құрсауынан босатылды
Ақтөбе облысы бойынша меншікті тілші
Ақтөбе станциясында жолаушылар пойызына арналған екі жол қардан тазартылды. Вагондарға су құю кезінде қатқан мұздар ойылып, жолаушыларға қауіпсіз болу үшін перрон да мұз құрсауынан босатылды.
Бұл жұмысқа Ақтөбедегі бірнеше теміржол мекемелерінен жүзден аса жұмысшы жұмылдырылды. Ақтөбе станциясының бастығы Нұрлан Ермағамбетовтің айтуынша, осы бір күннің өзінде станция аумағындағы 700 метр аумақ қар мен мұздан толықтай тазартылған.
«Басты жолды қардан, мұздан тазалау жұмыстары апта сайын ұйымдастырылады. Бұл ең алдымен жүргіншілердің және жылжымалы құрамның қауіпсіздігі үшін маңызды», – дейді ол.
Таңғы сағат тоғыздан аса жұмысқа кіріскен теміржолшылардың қимылы еріксіз сүйсіндірді. Таңғы ауадағы аздаған аязға қарамастан ширақ қимылға көшкен жігіттердің мұзға қадаған күректерінің шарт-шұрт дыбысы бірдей ырғақпен қайталанып жатыр. Ал қар тазалайтын техника әрі-бері бірнеше қайтара жүріп өтіп, жол жиегінен ойылған мұзды жинау жұмыстарын жеңілдетуде.
«Мұз көтерілсе, қос рельстің бойымен жүріп тұрған тоқты жауып қалуы кәдік. Ол жылжымалы құрамның жұмысын қиындатып, механиктер жұмысына кедергі келтіреді. Сондықтан рельстегі мұзды үнемі ойып отырамыз. Мұзды түсіріп, қауіпсіздіктің сақталуына күш саламыз», – дейді жұмысқа жетекшілік етіп жүрген жол дистанциясының бригадирі Сайран Бақбергенов.