Ақтөбе вокзалында күдікті адамдардың жүріс-тұрысы қатаң тексеріледі

Ақтөбе теміржол вокзалы арқылы 13 жұп жолаушы пойызының тасымал қызметі ұйымдастырылады. Екі бірдей халықаралық пойызды қабылдап отырған кластан тыс станцияда қауіпсіздікті арнайы тексеру қызметі бақылайды.

Вокзалда жолаушыларға сервистік қызмет көрсету деңгейі талапқа сай деп айта аламыз. Мүмкіндігі шектеулі жандарға арналған билет кассалары, электронды кезек жүйесі жұмыс істеп тұр. Тоғыз кассаның үшеуінің жұмысын «Жолаушылар тасымалы» АҚ ұйымдастырып отыр. Қалған кассалар жеке кәсіп иелеріне тиесілі. Кассалар қызметі қатаң бақылануда, алыпсатарлар жоқ. Төлем терминалдары, пойыздардың жол жүру кестесі, ақпараттық-анықтама тақтасы бар. Асхана, дәмхана, дәріхана, полиция бөлмесі, жүк сақтау қоймасы, күту залы, мүгедектерге арналған демалыс бөлмесі, сауда дүңгіршектері мен тегін әжетхана жұмыс істеп тұр.  

Лаңкестікпен күресті қамтамасыз ету мақсатында вокзал кіреберістеріне өткізу турникеттері қойылған. Оны арнайы тексеру қызметі бақылап отыр. Бейнебақылауда тәулік бойы оператор отырады. Оқыс әрекет, күдікті адамдардың жүріс-тұрысы қатаң тексеріледі. Сонымен қатар қоғамдық тәртіпті бақылайтын желілік тәртіп сақшыларынан бөлек әскерилендірілген күзет қызметі бар.  

Вокзалдың хабарландыру радиосы жақсы жұмыс істейтінін аңғардық. Онда кез келген дүниеге жарнама жасалып, насихатталмайды. Құзырлы мекемелерден келген арнайы хабарландырулар мен мемлекет шешімдері туралы мәліметтер таратылады екен. Қазіргі уақытта, мысалы, қауіпсіздіктің сақталуын ескертуден басқа көліктерді тіркеуге қатысты ақпарат жүріп жатқанын байқадық.

– Ақтөбе теміржол вокзалы тәулігіне 3-4 мың жолаушыға қызмет көрсетеді. 13 жұп пойыз өтеді, екеуі – халықаралық жолаушылар тасымалы қызметіндегі қырғыз және өзбек елінің пойыздары. Сондықтан вокзал шаруашылығы жоғары стандарт негізінде жұмыс істейді. 60-қа жуық адам еңбек етеді. Вокзал алдында қала тұрғындары мен жолаушылардың демалуына арналған аллея бар. Қазіргі кезде вокзал алаңы мен перронды қар мен мұздан тазалау апта сайын ұйымдастырылуда, – деді вокзал бастығы Арсен Кенжин.