Темір жол саласының құқық қорғаушылары марапатталды
Ақтөбе облысы бойынша меншікті тілші
Еліміздегі тергеу қызметінің құрылғанына 60 жыл толған датаға орай темір жол саласының құқық қорғаушылары да мерейтойлық төсбелгімен мараптатталды.
Ақтөбе станциясында өткен салтанатты шараға көліктегі полиция ұжымы, ардагерлер салтанатты парадтық формамен келді. Тергеу қызметінде ұзақ жылдар бойы еңбек атқарған аға буын ардагерлер шараға арнайы шақыртылған. Сала ардагерлеріне «ҚР ІІМ Тергеу қызметіне 60 жыл» төсбелгілері және бөлім бастығының алғыс хаттары табысталды.
«Тергеуші қызметі – қызығы мен қиындығы қатар жүретін сала. Халықаралық деңгейде, ел аумағында тасымалданған жүктердің және жолаушылардың қауіпсіздігі аса маңызды. Темірдей төзімділікті талап ететін сала. Ең маңыздысы – әр қылмыстық істің артындағы адам тағдырына деген жауапкершілікті ескеріп, абыроймен қызмет атқару», – деді салтанатты жиында сөз алған сала ардагерлері.
Шарадан соң тергеушілер арасында шағын футболдан жарыс ұйымдастырылды. Нәтижесінде «Үздік шабуылшы» номинациясын әкімшілік полиция бөлімшесінің инспекторы Тимур Сайляуов алса, «Үздік қақпашы» номинациясын патрульдік полиция тобының полицейі Руслан Тильмаганбетов иемденді. «Үздік қорғаушы» номинациясын Экстремизмге қарсы күрес тобының аға жедел уәкілі Нұрназарбек Даулетов қанжығаласа, ал «Үздік гол» номинациясы тергеу бөлімшесінің аға тергеушісі Абылайхан Өтеуовке бұйырды. Барлық жеңімпаздар алғыс хаттармен және бағалы сыйлықтармен марапатталды.
Сондай-ақ Көліктегі полиция департаменті ұйымдастырған «Қазақстан Республикасының тергеушісі» тақырыбындағы көркем сурет салу сайысында туындылары үздік танылған тергеушілердің балалары алғыс хаттармен және сыйлықтармен марапатталды.
Мереке соңында қонақтарға шағын концерттік бағдарлама ұсынылды.
