Вагондар кезең-кезеңмен жаңаруда
«Қазақстан теміржолшысы» газетінің тілшісі
Жолаушы тасымалына қатысты, «Қазақстан темір жолы ҰК» АҚ қызметін биылғы алты айда елімізде 6,5 млн адам пайдаланған. Өткен жылға қарағанда бұл көрсеткіш айтарлықтай өскен.
Салыстырмалы түрде айтсақ, 2021 жылы 11,6 млн адам тасымалданса, 2022 жылы бұл көрсеткіш 14 млн адамға жеткен. Жыл соңына дейін жоғарыдағы көрсеткіш алты жарым млн екі еселенетіні айдан анық. Мамандардың айтуынша, Қазақстанда жолаушылар тарапынан теміржол көлігіне сұраныс тұрақты сақталып отыр. Әйтсе де, жолаушылар ескірген вагондерге жиі шағымданатынын ескеру қажет.
Қазір елімізде 2 553 жолаушы вагоны бар. Олардың жартысынан астамы 10 жылдан аса жұмыс істеп келеді. 486 вагон шамамен 11-20 жылдай жолаушылардың игілігіне пайдаланылып жүр. Десе де 957 вагон немесе 37% расымен ескірген, өйткені олар 28 жылдан артық қолданыста. Осы ретте «ҚТЖ» ҰК» АҚ жылжымалы құрамды жаңарту бойынша жұмысты мақсатты түрде және кезең-кезеңмен іске асырып жатқанын айта кеткен дұрыс. Айталық, кейінгі 10 жылда вагондар паркі 50%-ға жаңартылды. 2010 жылдан бастап 1 100- ден астам жолаушылар вагоны, оның ішінде 600-ден астам «Тальго» вагоны сатып алынды.
Былтыр отандық вагон жасау зауытының базасында швейцариялық технология бойынша шығарылатын жеңіл вагондарды жеткізіп, оларға техникалық қызмет көрсетуге байланысты келісімшартқа қол қойылды. «Stadler» компаниясы еліміздің басты теміржол операторы үшін 537 жеңіл вагонды құрастыру жұмысын ұйымдастыру мақсатында (2025-2030 жылдар аралығында) зауыттың өндірістік алаңы мен жабдықтарын жаңғыртуды жоспарлап отыр. Сонымен бірге биыл «ЗИКСТО» АҚ-нан 50 жаңа жолаушылар вагоны келеді деп жоспарланған. Теміржол көлігіне сұраныс қашан да болатынын ескерсек, вагон паркін кезең-кезеңмен жаңарту – уақыт талабы.