ҚТЖ-да теміржолшылардың кәсіби мерекесі аталып өтті (Фото)

Көлік қызметкерлері күні қарсаңында «ҚТЖ» ҰК» АҚ бас ғимаратында теміржолшылардың кәсіби мерекесіне арналған салтанатты жиын өтіп, онда еңбекте озат деп танылған бір топ сала еңбеккері «Құрметті теміржолшы» белгісімен марапатталды.  

Жиынның ашылу салтанатында алдымен «ҚТЖ» ҰК» АҚ Басқарма төрағасы Нұрлан Сауранбаев сөз алып, Компания жетістіктерімен таныстырды.  

«Құрметті әріптестер сіздерді кәсіби мерекелеріңізбен құттықтаймын! Компания теміржолшылардың төл мерекесін жоғары жетістіктерімен қарсы алып отыр. Компания тәуелсіздік жылдарындағы жүк айналымы бойынша рекордтық көрсеткіштерге қол жеткізді. Геосаяси  өзгерістерге қарамастан контейнерлік транзит өсіп отыр. Ауқымды жол жөндеу жұмыстары жүргізілуде, жаңа жолдар құрылысы басталды. Локомотив паркін жаңарту шапшаң жүріп жатыр. Мұның бәрі Компанияның сан мыңдаған еңбегіне адал, жауапты, ұйымшыл адамдарынан құралған ұжымдарының арқасы. Кәсіби мереке құрметіне Компания мен саланың дамуына сүбелі үлес қосқан мыңнан астам қызметкер марапатқа ұсынылды. Бұл күні біз ізін басқан іні буынға ақыл айтып, бағыт-бағдар беретін сала ардагерлеріне ерекше құрмет көрсетеміз. Бүгін біздің ортамызда Консультативтік кеңестің  және Ардагерлер кеңесінің мүшелері, аға буын ардагерлеріміз отыр. Жаңа ғана біз олармен кездестік. Ағаларымыз өздерінің тілек-баталарымен қатар ескертпелерін, ұсыныстарын да айтты. Әлбетте, мұның бәрі ескерілетін болады. Алда атқарылар жұмыс көп. Заман талабына сай жаңа технологияларды енгізу, саланы дамыту, тасымал өнімділігін арттыру, Компанияның алға қойған мақсат-міндеттерін іске асыруға және қоғамдық жұмыстарға белсене қатысатын мамандарға қолдау көрсету, теміржолға тиімді инновациялық  жаңашылдықтарды қолдану біздің бірлесіп атқаратын жұмыстарымыз. Біздің Компанияда өте талантты, салауатты өмір ұстанып, спортты серік еткен қызметкерлер көп. Қазір салтанатты шараға алдағы күндері «Самұрық-Қазына» әл-ауқат қоры ұйымдастырғалы отырған спартакиадаға барын салып, дайындалып жатқан спортшы-теміржолшыларымыз да бар. Біз оларға жеңіс тұғырынан табылып, компания абыройын асқақтата беруге сәттілік тілейміз», – дей келе Нұрлан Сауранбаев, компанияға табыс, теміржолшыларға береке, елге бейбітшілік тіледі.

Бұдан кейін ол биыл Компания бойынша «Құрметті теміржолшы» белгісімен марапатталып жатқан барлығы 76 адамның ішінен арнайы Астанаға шақырылған 11 сала қызметкеріне мәртебелі белгіні кеуделеріне тақты. Атап айтқанда, олар «Ақадыр машиналандырылған жол дистанциясының жол машинасының машинисті С.Қазмағамбетов, Жамбыл электрмен жабдықтау дистанциясы электрмен жабдықтау ауданының электромеханигі Н.Есалиев, Атырау жол дистанциясының жол шебері А.Ертаев, Илецк теміржол учаскесі филиалы Батыс теміржол учаскесінің жол шебері А.Ганюшкин, Қостанай ЖТ бөлімшесіне қарасты техникалық бөлімнің бастығы Р.Әбенова, Павлодар жүк тасымалдау бөлімшесі Екібастұз станциясының пойыз құрастырушысы Б.Ошақпаев, Сексеуіл локомотив пайдалану депосының локомотив бригадаларын оқыту нұсқаушысы М.Игіліков, «Жолаушылар тасымалы» АҚ «Оңтүстік» өңірлік филиалының аға нарядшысы Ш.Искабаева, «ҚТЖ-Жолаушылар локомотиві» ЖШС Сексеуіл станциясының аймақтық бөлімінің бастығы Б.Аяғанов, «Жолаушылар тасымалы»  АҚ «Батыс» өңірлік филиалы Маңғышлақ учаскесінің бастығы Қ.Сахипов, «Вагонсервис» АҚ Алматы жолаушылар вагондарын жөндеу филиалының техникалық жолаушылар паркінің жетекші инженер-электроншысы А.Литвиненко болатын.  

Марапатталушылар атынан теміржол саласында 35 жылдан астам уақыт жұмыс істеп жатқан «Ақадыр машиналандырылған жол дистанциясының жол машинасының машинисті С.Қазмағамбетов сөз алып, еңбектерін елеп, әділ бағасын беріп жатқан Компания басшылығына алғысын білдіріп, әріптестеріне ақжарма тілегін білдірді.  

Ресми бөлімнен соң теміржолшылар өз әріптестерінің күшімен ұйымдастырылған тамаша концертті тамашалады. Бұл жолы мерекелік концертке өңірлерде теміржолда тер төгіп жүрген өнерпаз талантты жастар да қатысып, көпшілікті көңіл сергітер әдемі әндерімен, шығармашылық еңбектерімен тәнтті етті. Тіпті, олардың арасында өз әндерін жолсерікке, теміржолға, машинистке арнаған жастар да болды.