Ақтөбе мен Орал аймақтары бойынша төрт адам «Құрметті теміржолшы» атанды (Фото)
Ақтөбе облысы бойынша меншікті тілші
«ҚТЖ-Жүк тасымалы» ЖШС «Батыс» филиалы және «ҚТЖ» ҰК» АҚ «Ақтөбе магистральдық желі бөлімшесі» ұжымдары Көлік қызметкерлері күнін атап өтті. Биылғы жүк тасымалы қызметіндегі жоғары көрсеткіш аймақ теміржолшыларының мерекелік көңіл-күйін еселей түсті.
«Жеті айдың қорытындысымен біз қаржы құрайтын көрсеткішті 106 пайызға орындадық. Жүк айналымынан жоғары деңгейге жеттік. Бұл – аймақ теміржолшыларының еңбегі. Кәсіби мереке құтты болсын!» – деді «Батыс» филиалы директорының орынбасары Айбек Таласов.
«Магистральдық желі бөлімшесі алға қойған міндеттер мен жүктемелерді толық орындады. Жол шаруашылығындағы күрделі жөндеу, белгі беру және байланыс, электрмен қамту саласында да жетістіктер жоғары деңгейде. Сіздерге алғыс айтамын. Еңбектеріңіз жана берсін. Әрқашан абырой биігінен көріне берейік», – деді Ақтөбе магистральдық желі бөлімшесінің директоры Серғали Жайлаубай.
Жиын әрі қарай еңбек адамдарын марапаттауға ұласты. Ақтөбе, Орал аймақтары бойынша төрт адам «Құрметті теміржолшы» атанды. Олар – Ақтөбе магистральдық желі бөлімшесінің Пойыздар қозғалысын басқару орталығының ауысым басшысы Қайрат Қалуов, Ақтөбе электрмен жабдықтау дистанциясы бастығының орынбасары Алтынбек Дәулетияров, Ақтөбе қорғаныс екпе ағаштар дистанциясының директоры Қазбай Қайжанов және Ақтөбе локомотив пайдалану депосының ардагері Асқар Таймағамбетов.
Сонымен қатар Ақтөбе магистральдық желі бөлімшесі Бершүгір дистанциясының бастығы Еркін Жұбаназаров, Қандыағаш жол дистанциясының бригадирі Мирамбай Ермекбаев, Никельтау жол дистанциясының шебері Досбол Мүсірепов және Шалқар белгі беру және байланыс дистанциясының электромеханигі Жәдігер Асабаев «Адал еңбегі үшін» медалін тақты. Ал Қандыағаш станциясының басшысы Асхат Мәжитов «Үздік басшы» атанды. Тағы 60-тан астам сала қызметкері алғыс хатқа ие болды. Шара соңы әзілкештер дайындаған көңілді кешке ұласты.
