Үздік жобалар іріктелді

ҚТЖ-да өткен Корпоративтік волонтерлер мектебі форумында еріктілер осы салаға қатысты маңызды жобалар ұсынды. Олар алдымен волонтерліктің 4 бағыты: әлеуметтік, экологиялық, корпоративтік және инклюзивтік бағыт бойынша командаларға бөлінді. Солардың ішінен ең үздік жобалар іріктеліп алынып, оны ұсынғандар жеңімпаз атанды. Алдағы уақытта бұл жобалар өндіріске енгізіліп, жүзеге асырылады.

Жобалар арасынан инклюзивтік еріктілік бойынша бірінші орынды Алматы ЖТ бөлімшесінен келген волонтерлердің мүмкіндігі шектеулі балаларға және олардың ата-аналарына жазғы демалысты ұйымдастыруға бағытталған «Q-LIFE» жобасы алды. Бұл жоба қоғамға көмек көрсету, мүмкіндігі шектеулі балалары бар компания қызметкерлеріне жәрдем етуді көздейді.  

– Алматы аймағы бойынша «ҚТЖ» ҰК» АҚ қызметкерлерінің 7 мен 18 жас аралығындағы мүмкіндігі шектеулі балаларына көмек көрсетуді көздейміз. Мақсат – ерекше санаттағы балаларға және олардың ата-аналарына арналған жазғы демалысты ұйымдастыру, сауықтыру шараларын өткізу, рухани қолдау, бұл балаларға қоғамның көзқарасын өзгерту, олардың еркін саяхаттауына жол ашу және еліміздің көрікті жерлерін тамашалауға септік ету, отандық туризмді дамытуға үлес қосу, – дейді осы жоба авторларының бірі, «Жолаушылар тасымалы» АҚ «Экспресс» филиалы Алматы учаскесінің жолсерігі Диана Бейімбетова.  

Ал волонтерлердің әлеуметтік бағыты бойынша «Бақыт кәрзеңкесі», корпоративтік бағыт бойынша «Жақсылық», экологиялық бағытта «ЭКО» жобасы жеңімпаз болды. Атап айтқанда, «Жақсылық» жобасын ұсынғандардың бірі, ЭЧ-25 электрмеханигі Азамат Бүркіттің айтуынша, олардың жобасы ҚТЖ-да мүгедек болып қалған қызметкерлерге көмек беруге, олармен әңгімелесіп, үнемі байланыс орнатуға, үйлерін жөндеп беруге бағытталған. Сол сияқты Астана теміржол вокзалы кешені пайдалану бөлімінің менеджері Әйгерім Садықованың айтуынша, «ЭКО» жоба мақсаты – компания қызметкерлерінің экологиялық мәдениетін арттыру.  

«Жолаушылар тасымалы» АҚ Батыс филиалы Маңғыстау телімінің пойыз бастығы Нұржан Сансызбайұлы, әлеуметтік бағыттағы «Бақыт кәрзеңкесі» жобасының мақсаты – қайырымдылық марафонын ұйымдастырып, соның шеңберінде қызметкерлердің ақшалай емес, заттай сыйлықтар жинап, оны балалар үйлерінің тәрбиеленушілеріне табыстау екенін айтады. Форумға қатысқан «Самұрық-Қазына» АҚ жанындағы әлеуметтік өзара ықпалдастық және коммуникация орталығының бас директоры Елдос Өмірзақов 2020 жылғы Еріктілер жылында ҚТЖ жастарының күшімен атқарылған жұмыстарды еске салып, теміржолшылардың қоғамдық жұмыстарға атсалысуын жоғары бағалады.  

– Бұл форум – волонтерлік сала бойынша «Самұрық-Қазына» қорына қарасты портфельдік компаниялар арасында өтіп жатқан алғашқы іс-шара. Еріктілік біздің қанымызда бар қасиет. Қазақ халқы бұрын да, қазір де асар жасап, ауылдарда бір-біріне көмек береді. Осы жағынан ҚТЖ жастары өте белсенді, – деді ол.  

«ҚТЖ-Жүк тасымалы» ЖШС бас директорының корпоративтік мәселелер жөніндегі орынбасары Владимир Бабиченко осыдан он шақты жыл бұрын өткен ҚТЖ жастар форумының алғашқы жеңімпазы болған сәтін еске түсіріп, саланың қазіргі буын өкілдеріне сәттілік тіледі. Форум барысында республикалық «Мектепке жол» акциясына қатысқан белсенді жастарға алғыс хаттар табысталды. Таза ойындар, яғни экологиялық ойындар бойынша «Мазалама» командасы жеңімпаз болып, «Теміржол білгірлері» зияткерлік ойынынан «Жақсылық» командасы бірінші орын алды.