Көлік министрі Ақтөбеде маңызды нысандарды аралады
Ақтөбе облысы бойынша меншікті тілші
Ақтөбе облысына жұмыс сапарымен келген Көлік министрі Марат Қарабаев жергілікті авто және теміржол инфрақұрылымдарымен танысып, әлеуметтік маңызды нысандарды аралады. Ақтөбе және Қандыағаш темір жол вокзалдарында болған министр жолаушылар сервисін жақсартуға тапсырма берді.
Көлік министрі өңірге сапарын тұрғындармен кездесуден бастады. Марат Қарабаевпен кездесу туралы алдын ала БАҚ арқылы және әлеуметтік желілерде хабарланып, кездесуге қоғам белсенділері мен әуе, теміржол және автожол салаларының жауапты өкілдері қатысты.
Қала тұрғындары ведомство басшысына жылу электр орталығы, мемлекеттік жергілікті электр станциясы және басқа да кәсіпорындар үшін көмір тасымалдауды қамтамасыз етуге қатысты сұрақтармен жүгінді. Облыс тұрғындарының басым көпшілігі жергілікті автожолдардың сапасына сын айтты. Сондай-ақ теміржол вокзалдарының жай-күйі, билет бағасы, авиабилеттердің қолжетімсіздігі сөз болды.
«ҚТЖ-Жүк тасымалы» ЖШС Батыс аймақтық филиалының директоры Бөріхан Беркімбаев Ақтөбе теміржол вокзалына барған министрді қала қақпасының жұмысымен таныстырды.
«Былтырғы жылдың қорытындысы бойынша вокзалдардың қаржылық көрсеткіші көңіл көншітпейді. Осыған байланысты Ақтөбе облысындағы көлік инфрақұрылымының әлеуметтік маңызды объектілерін дамыту жоспарлары мен жолаушылар сервисін жақсарту мәселесін қарастыру керек», – деді министр.
Вокзал ішін аралап көрген Марат Қарабаев қыста салқын болатын темір орындықтарды ауыстырып, қызмет көрсету сапасын жақсартуды тапсырды.
«Вокзалдардағы жағдайды жақсартуға бюджеттен қаржы қарастыру туралы ой бар. Жағдайды көзбен көріп, жан-жақты есеп-қисап жасап, шешім қабылдайтын боламыз», – деді Қарабаев.
Ақтөбе және Қандыағаш станцияларындағы теміржол вокзалдары 40-50 жыл бұрын салынған. 2013 жылы күрделі жөндеуден өткен. Бүгінгі таңда халықаралық транзиттік жолаушылар пойыздарын қоса алғанда, екі вокзал арқылы 18 бағытта жолаушылар пойызы қатынайды.
