Ақтөбе станциясында он күнде 130 азамат әкімшілік жауапкершілікке тартылды
Ақтөбе облысы бойынша меншікті тілші
Ақтөбе станциясында он күн ішінде 130 азамат әкімшілік жауапкершілікке тартылды. Қоғамдық орында қару алып жүру дерегі бойынша сотқа дейінгі тергеу басталды.
Станцияда 20-30 қараша аралығында өткен «Құқықтық тәртіп» жедел алдын алу іс-шарасы аясында Көліктегі полиция департаменті әсіресе күніне жүздеген адам келіп-кететін вокзалдың ішкі және сыртқы бөлігіндегі қоғамдық тәртіпті жіті бақылауға алды. Жедел-профилактикалық іс-шара теміржол қызметкерлерімен бірлесіп жүргізілуде.
«Қоғамдық орындардағы құқық бұзушылықты болдырмау, вандализм фактілерінің алдын алу, кәмелетке толмағандардың түнгі уақытта жүрмеуін бақылауға алуға бағытталған рейдтік іс-шаралар өткізуде. Қоғамдық тәртіпті бұзған азаматтарға қатысты әкімшілік хаттамалар толтырылды», – деп хабарлайды Көліктегі полиция департаментінің баспасөз қызметі.
Онкүндік шара кезінде қоғамдық орындарда мас күйінде жүрген 20 адам арнайы орынға жеткізілді. Ортаны ластап, қалдықтарды жолға тастаған 19 адам әкімшілік жауапқа тартылды. Сонымен қатар белгіленбеген жермен жүру, қоғамдық орында болу тәртібін бұзған 81 адам тәртіп сақшыларының назарына ілікті. Сонымен қатар өзімен бірге кастет алып жүрген жолаушыға қатысты сотқа дейінгі тергеу амалдары жүргізілуде.
