«Самұрық-Қазына» АҚ кәсіпорындары арасында IX Спартакиада өтеді
«Қазақстан теміржолшысы» газетінің тілшісі
«Samruk-Kazyna Trust» КҚ «Самұрық-Қазына» АҚ компаниялар тобының кәсіпорындары арасында өтетін дәстүрлі Спартакиада биыл да жалғасын таппақ. Ол ІХ рет Астанада өтеді.
Спорт додасына бүкіл республика аумағынан 16 құрама командаға топтасқан 1000-нан аса адам қатысады деп күтілуде. Бұл сайыс қызметкерлерге өздерінің шеберлігін, күш-жігерін, шымырлығын және командалық рухын көрсетуге тамаша мүмкіндік ұсынады. Спортты жанына серік еткен жандар 2024 жылдың 22-24 қарашасында, Астана қаласындағы Назарбаев университеті Атлетика орталығында бас қосып, 11 спорт түрінен бақ сынайды. Олар: футзал, баскетбол, волейбол, арқантартыс, үстел теннисі, армрестлинг, тоғызқұмалақ, асық ату, шахмат, жүзу және киберспорт.
Спорт мерекесінің аясында «Самұрық-Қазына» АҚ компаниялар тобының қызметкерлері тек жарысып қана қоймай, қайырымдылыққа да үлес қоспақ. Кеш барысында жиналған қаражат мектептерде инклюзивті кабинеттер ашуға бағытталады. Сонымен қатар шара аясында қатысушылар «Таза Қазақстан» экологиялық акциясына қолдау білдірмек.
Ұйымдастырушылар барлық жанкүйерлер мен көрермендерді «Спортқа «ИӘ» де!» ұранымен өтетін осы ерекше жарысқа белсенді атсалысып, әріптестерін қолдап, шынайы бәсекелестік көңіл-күйін сезінуге шақырады. Корпоративтік рухта бірігіп, ұмытылмас кештің бір бөлшегі болу мүмкіндігі туып тұр. Қатысушыларды тіркеу үшін spartakiadask.kz сайты жұмыс істеп тұр. Әзірге 26 қазанға дейін 200-ден астам адам қатысуға өтініш білдіріп, тіркелген. Жалпы аптаның әр күнінде таңертеңгі сағат 9.00 мен кешкі сағат 20.00 аралығында 87782529821; 87782529826 колл-орталыққа хабарласуға болады.