Темір жолды қардан тазартуға 280 техника әзірленді
Темір жолда қар тазалау үшін 280 бірлік арнайы техника: 192 қар тазалау және 88 қар жинау машиналары толық дайындықта, деп хабарлайды Rail-news.kz.
Барлық техника жоспарланған жөндеу және техникалық қызмет көрсетуден өтті.
Арнайы техника қыста қарлы учаскелерді ескере отырып, бүкіл теміржол желісіне таратылады. Магистральдық желі бойынша мұндай учаскелердің жалпы ұзындығы 5000 км-ден асады. Қар жинайтын және қар тазалайтын машиналардың негізгі бөлігі Ақмола, Қостанай, Павлодар, Қарағанды, Абай және Ақтөбе облыстарында шоғырланған.
Сондай-ақ, жолды қар үйінділерінен қорғау мақсатында қардан қорғайтын қоршаулар жөнделді. Бағыттамалық бұрмалардың үздіксіз жұмысын қамтамасыз ету үшін станцияларда пневматикалық үрлеу жүйелері жұмысқа дайын.
Теміржолшылар қыс мезгілінде, қатты жауын-шашын кезінде, автомобиль жолдары мен авиарейстердің жабылуы жағдайында жолаушыларды қауіпсіз және үздіксіз тасымалдауды қамтамасыз етуге дайын.