Жолаушылар пойыздарында 500-ден астам тәртіп бұзушы анықталды
Жыл басынан бері көліктегі полиция қызметкерлері пойыздардағы құқықтық тәртіпті қамтамасыз ету бойынша белсенді жұмыстар жүргізіп келеді. 2025 жылдың тоғыз айының қорытындысы бойынша 531 жолаушы қоғамдық тәртіпті бұзғаны үшін пойыздан түсірілген, деп хабарлайды Rail-news.kz.
Тәртіп бұзушылықтардың басым бөлігі – алкогольдік ішімдік ішу және мас күйінде қоғамдық орында жүру фактілері. Мұндай 496 жағдай тіркелген. Бұдан бөлек, ұсақ бұзақылықтың 15 дерегі және басқа да құқық бұзушылықтар анықталған.
Мәселен, Алматы – Астана бағытындағы пойызда болған оқиғаны айтуға болады. Шу станциясында көліктегі полиция бөлімінің қызметкерлері масаң күйде балағат сөздер айтып, түнгі уақытта жолаушылардың тыныштығын бұзған Жетісу облысының 37 және 42 жастағы екі тұрғынын пойыздан түсірді.
Олар бірден бірнеше құқық бұзушылық бойынша әкімшілік жауапкершілікке тартылды: қоғамдық орында алкоголь ішу, ұсақ бұзақылық жасау және тыныштықты бұзу. Ұсақ бұзақылық фактісі сотқа жолданды.
Көліктегі полиция департаменті жолаушыларды ескертеді: пойыздарда қоғамдық тәртіпті бұзу айыппұл салуға немесе әкімшілік қамауға әкеп соғуы мүмкін.