Қазақстан Ауғанстан арқылы теңізге шығу жолын қарастыруда
Қазақстан Ауғанстан арқылы өтетін теңіз жолын іске қосуды көздеп отыр. Көлік министрлігі бұл бастаманың егжей-тегжейін LS басылымына айтып берді, деп хабарлайды Rail-news.kz
Ведомствоның мәліметінше, қазіргі уақытта Ауғанстан мен Пәкістанды байланыстыратын CASA теміржол дәлізінің жобасы мемлекетаралық пысықтау сатысында тұр. Осы мақсатта елдер арасында меморандумдарға қол қойылып, мүдделі мемлекеттік органдардың қатысуымен ведомствоаралық жұмыс тобы құрылған.
Қазіргі таңда негіздемелік келісімдер, техникалық-экономикалық негіздеме (ТЭН) және қаржыландыру параметрлері дайындалып жатыр.
Жобаның қаржылық моделі, сондай-ақ Қазақстанның оған қатысу үлесі мен форматы инвестициялық келісімді дайындаудың келесі кезеңдерінде нақтыланатын болады.
Техникалық-экономикалық бағыттар толық анықталып, дәліздің жалпы конфигурациясы келісілгеннен кейін, Қазақстан аумағындағы бағыттың параметрлері, соның ішінде оның ұзындығы белгілі болады.
Жалпы, негізгі тұжырымдама Ауғанстандағы Торғұндыдан Спин-Болдаққа дейінгі теміржол дәлізін құруды және әрі қарай Пәкістанның теңіз порттарына шығуды қарастырады. Нәтижесінде Қазақстан, Түрікменстан, Ауғанстан және Пәкістанның көлік жүйелері өзара тоғысады. Орталық Азия елдері Оңтүстік Азия теңіздеріне тікелей шығу мүмкіндігіне ие болады.
Министрлік атап өткендей, жобаны іске асыру мерзімі ТЭН әзірленіп, тараптар арасында инвестициялық құжаттарға қол қойылғаннан кейін анықталады. Әзірге ұйымдастыру жұмыстары мен келісімшарттарды дайындау процесі жүріп жатыр.
Ведомство бұл жоба Қазақстанның транзиттік әлеуетін кеңейтіп, экспорт бағыттарын әртараптандырады және тасымал шығындарын азайтады деп күтеді. Бұдан бөлек, жүк тасымалы көлемі артып, елдер арасындағы сауда-экономикалық байланыстар нығая түспек.
Бұған дейін Вице-премьер Серік Жұманғарин Қазақстанның теңізге шығар жолы болмағандықтан, экономикалық тұрғыда «тынысы тарылып» жатқанын мәлімдеген болатын.
Ауғанстандағы Торғұнды – Герат – Қандағар – Спин-Болдақ бағыты Орталық және Оңтүстік Азияны байланыстыратын транзиттік дәліздің бір бөлігіне айналады.