Қауіпсіздік қағидасы

Жаңалықтар

29.12.2017, 17:15

Темірхан Бекебаев – 32 жылдан бері Састөбе бекетінде вагон қараушы-жөндеуші болып еңбек етеді. Дөңгелектің «денсаулығын» балғадан шығатын дыбыстан анықтайтын маман бұл істе нағыз шебер деп танылған. Тәуліктегі 24 сағаттың жартысында күндіз, 12 сағатында түнде жұмыс істейтіндіктен, бұл кестеге бой үйреткелі қашан. Састөбедегі Цемент зауытына кірген-шыққан вагондардың дөңгелегін көзбен шолып тұратын кәнігі маман қарап тұрып-ақ ақауды алыстан байқайтынын әріптестері жыр қылып айтады. – Ұжымда 5 вагон қараушы жұмыс атқарамыз. Жүк пойыздарында елуден төмені жоқ, кемі 55-57 вагон болады. 45 минута электровоздың басына барып, қысымын тексереміз. Қыста қалың киіммен кейде құрамның бір басынан екіншісіне жеткенше алқынатынымыз бар. Алайда, шүкір, үлгереміз. Қауіпсіздік қағидасы – біле білгенге көзге көрінбейтін ұсақ жұмыстардан, сақтауы тиіс ережелерден тұрады. Қазір пойыздар саны сиреп қалды. 1992 жылдары мүлдем аз еді, бүгінде көбейгені. Ал, біздің жас күнімізде күніне 40 жұп, 40 тақ, яғни 80-90 пойыз өтетін,- дейді Темірхан Ақтасұлы. Қазір Састөбедегі тақ және жұп жолдарда КТСМ аппараты орналасқан. Бірі 3342 шақырымның - 5, екіншісі 3359 шақырымның - 9 пикетінде. Вагон дөңгелегінің дискісі, буксасы қызып, бүйір рамасында ақау болса компьютерден көрініп тұрады. Бұл әмбебап құрылғы келгелі жұмыс жеңілдеген. Түлкібастан Састөбеге қарай ойға түсетіндіктен, құрамның салмағы ауыр тартып, осы себептен дөңгелектің дискісі жиі қызады екен. Ал, оны қырағы мамандар дер кезінде анықтап, қауіптің алдын алуға үйренген. Жаңа жыл түні тәжірибелі вагон қараушы Темірхан Бекебаев ауысымға түседі екен. Бірінші жыл емес, бірнеше рет Жаңа жылды жұмыста қарсы алғаны бар. Тек бірінші қаңтар күні жұмысты тапсырып көңілін демдеген соң ғана отбасына барып, бәйбішесі құйған қызыл сайды ішіп тағы бір жылды қарсы алғанымды сезінімін, дейді ол.

Қауіпсіздік қағидасы

Басқа да жаңалықтар

Қазақстан теміржолшысы газеті, №15 27 ақпан 2026 жыл