Жол машиналары жұмыс маусымында

Жаңалықтар

01.08.2016, 10:48

Өз алдына отау көтергеніне он жыл толған Шу машиналандырылған жол дистанциясында бүгінде жұмыс қызу. Жол жөндеу жұмысы жанданатын жаз маусымы, оған қоса дистанцияның ауқымы да, техникасы мен жұмыс күші де кеңейіп отыр. Қырқыншы машиналандырылған жол дистанциясының Қарағанды жақтағы сұрыптау телімі әкімшілік ғимараты және ангарларымен Шу машиналандырылған жол дистанциясына қосылып, кәсіпорынның ауқымы кеңею нәтижесінде бүгінде дистанция ауқымы да ұлғайып, жұмысшылар саны да артып, 525 адам еңбек етуде. Кәсіпорында 20 ресейлік, 19 австриялық, 18 француздық техникалар бар. Техникалардың ағымдағы жөндеу қыс айларында кәсіпорынның өзінде жүргізіледі. Көкшетаудағы «Рауан» ЖШС бірқатар техникаларды күрделі жөндеуден өткізген. Ал вагондары деполық жөндеу жұмыстарына кіріп, шығып жатыр. –Жартыжылдықты дистанция жақсы қорытындымен аяқтап отыр. Атап айтар болсақ, жолдың шағалтасын тазалаушы РМ техникасы жылдық жоспар 202 шақырымының бүгінде 88 шақырымын орындап отыр. ДУАМАТ кешендік техникасының жылдық жоспары 3570 шақырым болса, бұл техникалар бүгінге 1604 шақырымды еңсерді. ДГС техникасының жылдық жоспары 3600 шақырым болса, 1495 шақырымда жұмысты аяқтап отыр. ПБР машинасының жылдық жоспары 4200 шақырым, 2196 шақырымда жұмысты аяқтап отыр. УНИМАТ техникасының жылдық жоспары 200 бұрмалар мен 240 шақырым жол жұмыстарын жүргізу керек болса, бүгінге бұл техникалар 417 бұрма мен 99 шақырымды аяқтап отыр. Қалған техникалар жоспары болмаса да өздеріне бекітілген межелерді орындап отыр, - деп ақпар берді Шу машиналандырпылған жол дистанциясының Бас инженері Бақытжан Шадыбеков. Кәсіпорында «ЖЕЙСМАР» француздық техникасының үш кешені бар екен. Бүгінде үшеуі де жұмыс жасап жатыр. Қырқыншы машиналандырылған жол дистанциясынан келген СМД техникасы Астана жол дистанциясында жұмысқа жегілген. Сондай-ақ дистанцияның басқа техникалары да Екібастұз, Алматы, Ағадыр, Қарағанды, Жаңа Семей, Бейнеу және Шу ірілендірілген жол дистанцияларында жұмыс істеп жатыр екен. –Қозғалыс қауіпсіздігі бойынша ағымдағы жылы ешқандай ақау орын алған жоқ. Еңбекті қорғауда да жақсы көрсеткіш көрсетіп отырмыз. Көктемгі комиссиялық байқауда да ескертулер аз болды. Ал берілген ескертулер тез арада орнына келтірілді, - дейді бас инженер.

Жол машиналары жұмыс маусымында

Басқа да жаңалықтар

Қазақстан теміржолшысы газеті, №34-35 01 мамыр 2026 жыл