"Көп түкірсе – көл" деген...

Жаңалықтар

30.03.2018, 17:03

Оқуға 3 мин

Жуырда Аягөз станциясында су тасқыны зардабын шегуші аягөздік теміржолшылармен кездесу жиыны болып өтті. Семей ЖТ бөлімшесінің бас инженері, арнайы құрылған комиссияның төрағасы Отарбек Қасымбеков жүргізген басқосуда аталмыш мәселе төңірегінде келелі әңгіме қозғалды. Жиынды алғысөзбен ашқан Отарбек Кемелбекұлы бірінші кезекте Семейден арнайы келу мақсатын айтып өтіп, көктемгі қызылсу тасқынынан залал шеккен теміржолшыларға жәрдем көрсету және осы бағыттағы жүргізіліп жатқан жұмыстар жай-жапсарымен таныстыру екендігін жеткізді. – Бүкіл бөлімше бойынша бірлесіп көмек көрсету мақсатында қаржы жинау мәселесі ұйғарылған болатын. Жалпы, су тасқынынан зардап шеккендерге жәрдем мақсатында қалалық әкімдік тарапынан арнайы қайырымдылық қоры құрылғаны белгілі. Барша теміржолшылар ат салысатындықтан көмек қомақты болар деп ойлаймын. Бұл бағытта менің жетекшілігімдегі комиссия арнайы жұмыс жүргізіп жатыр, – деді өз сөзінде Отарбек Кемелбекұлы. Қазіргі күні су тасқынынан зардап шеккендер тізімі жасалынған. Барлығы 28 теміржолшының үй-жайы толықтай тексерілуде. Арнайы акт жасау мәселесі жергілікті әкімдік құрған комиссиямен бірлесіп шешілуде. Бас инженер айтып өткендей, бұл жерде барлығы заң аясында шешімін табатын болады. Сол үшін де үй-жайлары бүлінген сала қызметкерлері дефектілік акт пен қоса жылжымайтын мүлікке иелік туралы құжаттарды толық жинастырып пысықтаулары қажет. Қазіргі күні мәлім болғандай, үш теміржолшының үйі құлап, тұруға жарамсыз деп танылған. Қазіргі күні олардың үшеуіне тұрғын үй берілген. Әрі бұл тізім таяу аралықта тағы да толыға беретін болады. Бұл ретте қалалық әкімдікпен ымыраластықта іс жүргізген комиссия жұмысын айта кету орынды. – Біз осыған дейін бөлімше басшылығынан құрылған комиссия арнайы тексеру шараларын жүргізген едік. Мән-жайға толық қанықтық. Тек облыс әкімі Даниал Ахметовтің тапсырмасы аясында қалалық әкімдікпен бірлесіп жанды жұмыс жасаудамыз. Сіздердің барлықтарыңыздың да жағдайларыңыз бөлімше басшылығының назарында тұр. Теміржол ешқашанда өз қызметкерлерін қиыншылықта қалдырып қоймайды, – деп атап өтті Отарбек Кемелбекұлы. Жиын барысында тасқын судан зардап шеккен теміржолшылар да сөз алып, бірқатары көңілдері күпті екендіктерін жеткізді. Көпшілігінің үйлеріне жарықшақ түскен. Мәселен, үйлерді қараған қалалық комиссия «күрделі жөндеу өткізілсе, тұруға жарамды» деген қорытынды жасапты. Әйтсе де, іргесі сөгілген кейбір нысандардың күн жылынысымен құлап қалмасына кепілдік жоқ. Бұл сауалға жауап қайырған бас инженер аталмыш мәселенің де қадағалауда тұрғанын жеткізді. Негізгі міндет – арнайы құжаттарды жинастырып өткізу қажет. Сонымен қатар, жиын барысында арнайы келген Семей магистральдық желі бөлімшесінің бас инженері Айдос Жаманбаев та сөз алып, Жыланды станциясындағы үйі құлаған теміржолшыға үй салып беру мәселесі көтерілгенін жеткізді. Бұл ретте барлығы да заң аясында шешім табатын болады. Материалдық көмек беріледі. Теміржолшылар жиналып асар жасауға да әзір. Жиын қорытындысында бас инженер Отарбек Кемелбекұлы қатысушылар сөзін тыңдап, бірқатар өтініш-пікірлерді қойын дәптеріне түртіп алды. Айтылған, талқыланған мәселелер қатары алдағы уақытта толық ескерілетін болады. Ол үшін арнайы хаттама жасалынып, негізгі міндеттер межеге алынды.

"Көп түкірсе – көл" деген...

Басқа да жаңалықтар

Қазір оқылуда

Қазақстан теміржолшысы газеті, №81 13 қазан 2026 жыл