БАСТЫ ТАЛАП – ҚАУІПСІЗДІК

Жаңалықтар

30.03.2018, 17:15

Семей ЖТ бөлімшесі бойынша пойыз қозғалысы қауіпсіздігін сақтау мәселесі өткір тұр. Осыған орай қоғалыс саласы қызметкерлерінің білімін, кәсіби біліктілігін арттыру және жұмыс орнындағы еңбек қауіпсіздігін сақтау мақсатында «Вагондарды қауіпсіз тарату» айлығы ұйымдастырылды. Ұлттық компанияның техникалық саясаты негізінде өткізілген шара барысында бөлімше басшысының төрағалығымен арнайы комиссия құрылып, құрамына директор орынбасарлары, бөлімдер басшылары, қозғалыс қауіпсіздігі қызметкерлері, өндірістік-техникалық бөлім мамандары, қозғалыс ревизоры, локомотив және вагон шаруашылықтары басшылары тартылды. Осылайша, ЖТ бөлімшесі жетекшілерінің желі бойына қызметтік сапарлары ұйымдастырылып, тексеру жұмыстарының жоспарлары жасалынды. Нәтижесінде, күллі бөлімшедегі сұрыптау дөңестерінен таратылатын вагондар бойынша маневрлік жұмыс өндірісінің технологиясы қатаң түрде тексеруден өткізілді. Бұл шара аясында пойыз құрастырушылары мен вагон жылдамдығын реттеушілер, сұрыптау дөңесінің кезекшісі мен операторлары, маневрлік локомотивтер машинистерінің өз міндеттемелерін білу деңгейі, процесс барысында әрекет ету тәжірибесі де сарапқа түсті. Сондай-ақ, қызметкерлердің станцияның сұрыптау жұмысына байланысты регламенттері мен нормативтік-техникалық құжаттамаларын білу, жұмыс істеу біліктілігі де сыналды. – Осы ретте, Семей ЖТ бөлімшесінің ревизорлары жүргізілген айлық барысының сапасын қадағалауға алып, сұрыптау процесі барысындағы қауіпсіздік талаптарының орындалу барысында бақылап, назарда ұстады. Ал, бұл орайда, қызметкерлер жіберген кемшіліктер қатары бойынша жұмыс жүргізілетін болады. Яғни, алдағы уақыттарда ақаулықтарға жол бермеу үшін алдын алу жұмыстары күшейтілмек, – дейді «ҚТЖ» ҰК» АҚ Қозғалыс қауіпсіздігі департаменті Семей телімінің аймақтық бас ревизоры Сайлау Юсупов.

БАСТЫ ТАЛАП – ҚАУІПСІЗДІК

Басқа да жаңалықтар

Қазақстан теміржолшысы газеті, №108 26 желтоқсан 2025 жыл