Азия кубогын сарапқа салды

Жаңалықтар

30.03.2018, 17:59

Шымкентте теміржолшылардың «Локомотив» клубының мүшелері және «Турон» жауынгерлік өнер федерациясының ұйымдастыруымен жастар мен ересектер арасында екі күнге созылған Азия кубогы болып өтті. «ЖТ Шымкент» филиалындағы ардагерлер кеңесінің төрағасы Нұрғали Нұртаев және кәсіподақ комитетінің төрағасы Хайролла Сәрсеновтер кубоктың өтуіне барынша атсалысып, теміржол кәсіпорындары демеушілік жасады. Мұндай сайыс «Шымкент локомотив клубы» қайта қалпына келтірілгелі үшінші рет ұйымдастырылуда. Жауынгерлік өнерге жататын жекпе-жек, күрес, бокс, кидбокс, у-шу, таэквандо сынды спорт түрлерінен өткен жарысқа 9-35 жас аралығындағы 80-нен аса балалар мен ересектер қатысты. Бұл жолы да Өзбекстан мен Қазақстанның әр облыстарынан бөлек, Ресейден де үміткерлер келген. Келер жылы Қырғызстан жастары да қатысады деген сенім бар. Ұйымдастырушылардың бірі, халықаралық деңгейдегі еңбек сіңірген спорт шебері Алекстандр Теннің айтуынша, Өзбекстан мен Ресейдегі «Локомотив» клубы жоғары деңгейде жұмыс істейді. Шымкенттіктер де келешекте көршілердің деңгейіне жеткісі келеді. Қазір әр елдегі «Локомотив» спорт клубтарының арасында «Азия кубогы» сайысы жүруде. Осы жолы Шымкентте сәтті өтсе, күнтізбелік жоспарға енгізіп, жыл сайын халықаралық турнир деңгейінде ұйымдастырмақ. Тек балалармен ғана емес, ардагерлермен, мүгедектермен де жұмыс істейді. Одан ешкім спортшы болып кетпесе де, өмірге деген құлшыныстары оянып, салауатты өмірді салтқа айналдырса, соның өзі жеткілікті. – Балаға спортты мәжбүрлеп, зорықтырып үйретпеген абзал. Бала спортты өзі қаласа ғана жақсы көріп айналысады. Кейде ата-аналар балаларының ай сайын бір спорт клубынан шығып, екіншісіне жазылатынын айтып, шағымданады. Менің 5 жасар қызды дайындап жүргенімді көргендер «осыған да уақыт бөлесің бе?» деп күледі. Егер балаға қызық болса, неге уақыт бөлмеске? Бес жасынан келген бір шәкіртім қазір 15 жасар бойжеткен. Үзбей спорттың бір түрімен айналысып, белгілі бір жетістіктерге жетті. Біз олардан жауынгер жасамаймыз, тек денсаулығын шыңдап, салауатты өмір салтын қалыптастырғанын қалаймыз, сосын әрине өзін өзі қорғай алғаны да жақсы баланың. Жалпы спортты тұрақты серік еткен бала жаман әдеттен аулақ болады, – дейді дүниежүзілік «Турон» жауынгерлік өнер федерациясының аймақтағы өкілі Александр Тен.

Азия кубогын сарапқа салды

Басқа да жаңалықтар

Қазақстан теміржолшысы газеті, №31 24 сәуір 2026 жыл