Күзет қызметі қалғымайды: материалдарын қапшықтап ұрлағандар қолға түсті
Ақтөбе облысы бойынша меншікті тілші
Темір-терсек тапсырып күн көруді әдетке айналдырғандар шойынжол бойына да жетті. Қандыағаш станциясы маңынан жолдың үстіңгі қабатының материалдарын қапшықтап ұрлағандар қолға түсті.
«Әскерилендірілген теміржол күзеті» АҚ Ақтөбе филиалы Қандыағаш станциясындағы атқыштар командасының жедел әрекет етуінің нәтижесінде күдіктілер қолға түскен. Олар рельс бетіндегі металл бұйымдарды қапшықтап терген. Атқыштар командасының күзетшілері Ақылбек Өтегенов пен Шоқан Бұқарбаевтың қырағылығының нәтижесінде бұзақылар қолға түсті.
«Оқиға осыдан бірнеше ай бұрын болған. Қандыағаш қаласының оңтүстігіндегі теміржол аумағында күдікті болып көрінген екі адамды біздің күзетшілер заттай айғақпен қолға түсірді. Рельс төсемелері, жапсырмалары, әртүрлі бұрмаларын шешіп алған», – дейді Қандыағаш станциясындағы атқыштар командасы бастығының орынбасары Құрманғазы Жалмағанбет.
Қандыағаш атқыштар командасындағы 120 күзетші Атырау бөлімшесіне дейінгі аралықты түгел бақылайды. «Тораптық станцияда жұмыс күрделі. Бекітілген қызмет көрсету аймақтарында қауіпсіздік қатаң бақылауға алынған. Станция, вокзал, байланыс -белгі беру дистанциясы, жол дистанциясы, электрмен жабдықтау дистанциясы секілді теміржол мекемелері де күзетпен қамтылған. Күзетшілеріміз төрт ауысымдық топпен жұмыс жасайды. Негізгі мақсатымыз – теміржолдағы құқықбұзушылықтың алдын алу, ұрлықты болдырмау. Теміржолды белгіленбеген жерден кесіп өткендер де біздің бақылауымызда. Бізде теміржол аумағы қоршалған, сондықтан мұндай заңбұзушылық көп тіркелмейді. Жыл басынан бері белгіленбеген жерден өту бойынша Қандыағаш станциясында 4 дерек анықталды. Өткен жылдың жеті айында 14 адам болған», – дейді Құрманғазы Жалмағанбет.
Күзет қызметінің арқасында биылғы жылы Қандыағаш-Шұбарқұдық және Шұбарқұдық-Сағыз аралығында жүк вагондарының ұрлығы мүлде тіркелмеген. Бұл – өте жақсы көрсеткіш.