Болат дөңгелек – тиімді бағамен
Ақтөбе облысы бойынша меншікті тілші
Ағымдағы жылдың 25 тамызынан бастап Украинадан шығарылған тұтас құйма болат дөңгелектерге қатысты демпингке қарсы бажды уақытша алып тастау туралы шешім күшіне енді.
Бұл жоба Қазақстан, Ресей және Беларусь теміржол ұйымдарының бірлескен жұмысының арқасында жүзеге асқан. Өткен жылдың сәуір айында украиналық жеткізушілердің дөңгелектерге бағаны төмендетуіне байланысты, ЕАЭО елдерінің дөңгелек өндірушілерін қолдау мақсатында демпингке қарсы баж мөлшерлемесін көтеру туралы шешім қабылданған еді. Кейіннен теміржол дөңгелектеріне сұраныс артып, өндірістік қуаттар толық пайдаланылғанына қарамастан, өндірушілер оны толығымен қанағаттандыра алмады. Бұл жағдай дөңгелектер құнына теріс әсерін тигізді. Тұтынушылар қажетті мөлшерде сатып алу мүмкіндігінен айрылды.
«Нарықтағы қанағаттандырылмаған сұраныс тек дөңгелектердің ғана емес, сонымен қатар жылжымалы құрамды жөндеудің де қымбаттауына себеп болды. Бұл факторлар теміржол тасымалы бағасының өсуіне әкелуі мүмкін. Әрі теміржол қызметі вагон дөңгелектерін барынша тозығы жеткенше пайдалануға мәжбүр болған. Осы жағдайлар мен баға мониторингінің нәтижелерін ескере отырып, үстіміздегі жылдың маусым айында жаңа демпингке қарсы істі қарау басталды. Нәтижесінде 2019 жылдың 25 тамызынан 2020 жылдың 1 маусымына дейін Украинаның дөңгелектеріне қатысты демпингке қарсы бажды уақытша қолданбау туралы шешім қабылдады», – деп хабарлайды Еуразиялық экономикалық комиссия.
Соңғы уақытта бір дөңгелектің құны 100 мың ресей рубліне жетті. Демпингке қарсы шектеу бажының уақытша қолданылмауына байланысты енді теміржол дөңгелектерін Украинадан сатып алу кезінде олардың бағасы 35% төмендеуі мүмкін.