Шар мен Қарағайлы арасына теміржол салына ма?
Абай облысы бойынша меншікті тілші
Шығыстағы теміржол саласында жолаушы және жүк тасымалы бойынша өткен жылы атқарылған іс-шаралар сарапталып, алдағы жоспарлар пысықталуда.
Айта кету керек, соңғы екі жылда қайта құрылған Абай облысының дамуына Семей теміржолы ауқымды үлес қосты дей аламыз. Мысалы, араға 25 жыл салып қайта ашылған «Кіші Түрксіб» балалар теміржолын, құрылысы қарқынды жүріп жатқан «Бақты-Аягөз» жаңа теміржол желісін, сонымен қатар жергілікті тұрғындар үлкен қуанышпен қабылдаған «Семей-Шар», «Ақтоғай-Аягөз» жолаушылар пойызы тасымалын айтсақ та жеткілікті.
Мәселен, соңғы екі жаңа бағдар мен маусымдық «Семей-Жалаңашкөл» бағытындағы жолаушы пойыздарымен 2025 жылы жалпы саны 71 346 жолаушы тасымалданып, облыстық әкімдік тарапынан 390,8 млн теңге қаржы субсидияланыпты. Бүгінгі таңда жолаушыларды тасымалдау белгіленген кестеге сәйкес тұрақты түрде жалғасып жатыр. Болашақта Дегелең – Семей, Ауыл – Семей станциялары арасында жергілікті жолаушылар пойызы қатынасын жандандыру да қарастырылуда.
Жуырда Шар станциясында ҚР Парламенті Мәжілісі депутатымен және облыстағы «Ауыл» партиясының депутаттық фракциясы мүшелерімен кездесу өтті. Осы кездесу барысында Шар станциясынан Қарағандының Қарқаралы ауданының Қарағайлы станциясына дейін жаңадан теміржол желісін салу жөнінде мәселе көтерілді. Әрине жергілікті жұртшылық тарапынан айтылған бұл ұсыныс әлі де жан-жақты пысықтауды, терең зерделеуді қажет етеді. Дегенмен, бұл жобаның оң шешілуі қос облыстың, олардың арасындағы ауылдық елді мекендердің дамуына да зор ықпалын тигізіп, шығыс пен орталық өңірлер арасын жалғайтын төте жол қанша уақыт пен ресурстар үнемдеуге септігін тигізері сөзсіз.
– Еліміздегі көлік логистикасының дамуына Президент ерекше мән беріп отыр. Экономиканың локомотиві саналатын теміржол саласының дамуы ел қазынасына қосымша қаржы құюмен қатар, теміржол бойындағы елдімекендердің дамуына, тұрғындардың әл-ауқатының жақсаруына айтарлықтай серпін беретініне күмән жоқ. Сондықтан Шардың болашағы жақсы болатынына сенім мол, – деген халық қалаулысы Жигули Дайрабаев жоба жайында Мәжіліс мінберінен тиісті органдарға депутаттық сауал жолданатынын жеткізді.