Көшкін қаупін сейілтті
Сәуір туғанмен қыстай жауған қалың қар барлық жерде ери қойған жоқ. Демек, көшкін қаупі бар деген сөз. Бұл әсіресе, көктем кеш келетін солтүстік пен шығыс өңіріне тән.
Осыған орай, «ҚТЖ»ҰК»АҚ – Магистралдық желі дирекциясы темір жолдың көшкін болуы мүмкін учаскелерінде жарылыстар жүргізіп, көшкін қаупін сейілтуде. Атап айтқанда Шығыс Қазақстан облысында көшкіндер мен тастардың құлауының алдын алуға бағытталған бірқатар іс-шаралар орын алды.
Семей магистральдық желі дирекциясының шығыс өңірі бойынша директорының орынбасары Әлібек Шумановтың мәлімдеуінше, Серебрянск және Защита жол дистанцияларында су тасқынына қарсы пойыздар жасақталған. Бүгінгі таңда қар 70% дейін еріген, ал өзенкөлдерде, әсіресе Бұқтармадағы су деңгейінің көтерілуі тау бөктерінде қар ери бастайтын мамыр айында орын алады деп күтілуде. Су тасқыны жағдайына тұрақты бақылау ұйымдастырылған. Көшкін қаупі бар учаскелерден қар түсіру үшін қажетті жарылыс жұмыстары жүргізіліп, жасанды құрылыстар қар мен мұздан тазартылуда. Жұмыс бригадасы құрамына кәсіби алипинистер де кіріп отырғанын атап өту керек.
Жалпы алғанда, өткен жылдар тәжірибесі еліміздің барлық өңірінен 673 қауіпті орындарды айқындап берді. Бүгінде белгіленген қауіпті орындарға тәулікбойғы кезекшілік, қосымша шолулар мен барлаулар ұйымдастырылған.
Магистральдық желі дирекциясының мәліметінше, бүгінгі таңда қажетті материалдармен жарақтандырылған 42 тасқынға қарсы пойыз жасақталған.