Электровозды шұғыл тоқтатуға мәжбүр болған

Манкент станциясында 2 жаяу жүргіншілер көпірі бар, арнайы 20 қауіпсіздік белгісі орнатылған. Бірақ, өкінішке орай, жергілікті тұрғындар көбіне көпірді қолданбайды, қауіпсіздік белгісіне мән бермейді. Салдарынан қауіпті оқиғалар орын алып жатады.

Осы жылдың ақпан айында ауысымға шыққан №2003 пойызының машинисі Иманбаев электровозды шұғыл тоқтатуға мәжбүр болған. Өйткені ол станцияның бас жолы саналатын бірінші жолдан өтуге бет алған бөгде адамды көзі шалып қалады. Пойыздың шұғыл тоқтау себебін тексере келе, 10 минут бұрын дауыс күшейткішпен бірінші жолдан пойыз өтетіні жайлы хабарлама қайтақайта жасалғаны анықталады.

Сәуір айының басында станцияның шыға берісіндегі бағыттамалы бұрма жанында №2216 пойызының машинисі Иваненко де шұғыл тежегіш жасауға тура келген. Бұған да сол, арнайы өткелден өтуге ерініп, жолды кесіп өтпек болған адам себеп болған. Сағат кешкі бестер шамасында болған шұғыл тежеуден абырой болғанда адам зардап шеккен жоқ.

Станция қызметкерлері желілік полиция бөлімінің қызметкерлерімен бірлесіп тұрақты түрде рейд жүргізіп отырады және «Теміржол маңы – аса қауіпті аймақ» тақырыбында мектептерде түсіндіру жұмыстарын өткізеді. Олар халыққа теміржол аймағында құлаққаппен жүрмеуді, әр дыбысқа назар аударуды, теміржолдан арнайы өтпе жолдар арқылы өтуді, вокзалдан асығып шықпай жан-жаққа қарау керектігін ескертумен келеді. Теміржол нысандарында токтың кернеуі 27000 вольтты құрайтынын да жиі қаперге салады. «Теміржолда болатын қайғылы жағдайлар белгіленген орындардан өтпеу, рельс үстімен жүрмеу сынды ережелердің бұзылуынан болып жатады. Егер де тұрғындар мен жолаушылар теміржол бойындағы қарапайым қауіпсіздік ережелерін сақтайтын болса, қайғылы жағдайлар орын алмас еді. Алайда, көпшілік, әсіресе жасөспірімдер ескертулерді елемейді. Ол аздай пойыздың төбесіне, жылжымалы құрамдардың үстіне шығып кететін бұзақы жасөспірімдер бар», – дейді Манкент станциясы басшысының орынбасары Асхат Ақберді.