ҚТЖ өзіндік оқуға көшті
«Қазақстан теміржолшысы» газетінің тілшісі
Елімізде короновирус пандемиясына байланысты карантин жариялануына орай, «ҚТЖ» ҰК» АҚ төтенше жағдайларды басқару жөніндегі штабтың шешіміне сәйкес теміржол саласы өз жұмысын қауіпсіздік талаптарына сай жүргізіп отыр.
Бүгінгі таңда адамдар қауіпсіздігі бірінші орынға шықты. Сондықтан, теміржол кәсіпорындарында жұмысшы-қызметкерлердің жеке бас қауіпсіздігі үшін барлық шара лар қабылдануда. Атап айтқанда, міндетті техникалық сабақтардың онлайн режімде өте бастағаны жайлы хабарлаған болатынбыз.
Астана вагон пайдалану депосында өткен наурыз айына жоспарлаған 24 техникалық сабақтың 16 наурызға дейін тек үшеуі өткен болатын. Елордада карантин жариялануына орай техникалық сабақтар жұмысшылардың өз беттерінше оқуына көшіріліпті.
«ҚТЖ-Жүк тасымалы» АҚ-ның техникалық саясат жөніндегі атқарушы директоры Б.Ибраевтың факсограммасына сәйкес 16 наурыз бен 15 сәуір аралығында вагон депосы қызметкерлеріне өткізілетін техникалық сабақтар тоқтатылып, жылдық жоспарға сәйкес өзіндік оқуға ауыстырылды. Бұл сабақтарда вагон қараушыжөндеушілермен қос доңғалақтар, пайдалану кезіндегі техникалық талаптар, негізгі ақаулықтар, оларды анықтау тәсілдері, сигналдар, көрінетін және дыбыстық сигналдар, лаңкестік актілер қаупі бар және бола қалған жағдайда іс-қимылдар мен әрекеттер сынды тақырыптарды қамтудамыз», – дейді депоның инженер-технологы Дархан Ахитов.