Теміржолшылар қатарын толықтырмақ
Ақтөбе облысы бойынша меншікті тілші
Жыл сайын теміржол көлігі мамандарын дайындайтын жоғары және арнайы орта білім беретін оқу орындарын бітіріп, бірнеше мың жас теміржолшы мамандығын алады.
Бірақ сол жас түлектердің бәрі бірдей теміржолға келіп, кірпіш болып қаланбайды екен. Тек қызығынан қиындығы көп саланың ыстықсуығына төзе білген шыдамдылары ғана жылдар өте нағыз теміржолшылар болып қалыптасады.
Ақтөбе көлік, коммуникация және жаңа технология колледжін биыл тәмамдайтын 436 түлек жас теміржолшылар легін толтыруға дайын.
Еліміздің кәсіптік білім беру көкжиегінде елеулі орны бар, бәсекеге қабілетті, ұлы істерге ұйтқы болған білім ордасының тоқсан жылға жуық тарихы бар.
Ширек ғасырдан аса уақыт аймақтағы теміржол, басқа да өндірістік салаларға орта буын мамандар дайындап келген білім ошағы Ақтөбе Жүк тасымалы мен Ақтөбе магистральдық желі бөлімдерімен, аймақтағы басқа да теміржол мекемелерімен, жөндеу секторымен тығыз қарым-қатынас орнатқан, сондықтан жергілікті теміржол мекемелері колледж түлектеріне жұмыс ұсынуға әркез дайын.
«Студенттеріміз теміржол мекемелерінде тәжірибеден өтіп, білімдерін шыңдап жүр. Рухани жаңғырудың жарқын жолы білімде десек, болашаққа заманауи инновациялық ізденісі тың, ақпараттық технологиялары жаңа, материалдық-техникалық базасы бай қара шаңырағымыздың бәсекеге қабілетті кәсіби маман даярлауда мүмкіндігі жоғары, ал бұл істе бізге әрдайым теміржол мекемелері көмекке келетінін – біздің ортақ мүдде жолындағы өзара әріптестігімізді одан әрі баянды ете түседі», – дейді Ақтөбе көлік, коммуникация және жаңа технология колледжінің директоры Жеңісгүл Мұхамбетпайзова.
Таяу күндері елдегі карантиндік жағдайға байланысты онлайн емтихан тапсырған бітіруші түлектер диплом алып үлкен өмірге қанат қаққалы отыр. Бірқатар үздік нәтиже көрсеткен студенттер үшін жұмыс орындары дайын, олар биылдың өзінде теміржолшылар қатарын толықтырмақ көрінеді.