«Темір тұлпарлар» жазғы тасымалға дайын
«Қазақстан теміржолшысы» газетінің тілшісі
Биыл 10 сәуірден бастап Сексеуіл локомотив пайдалану депосында көктемгі комиссиялық байқау жүргізілді. 24 мамырда аяқталған дәстүрлі тексеру жұмыстарының нәтижесінде депоның жазғы тасымалға дайындығы жоғары деңгейде деп, жалпы жұмыс көрсеткіштеріне оң баға берілді.
Тексеру барысында жолаушылар мен жүк тасымалын жүзеге асыратын локомотивтерді жазғы кезеңге дайындау шаралары қаралды.
Атап айтқанда, әрбір бекітілген тепловоз жағдайын жақсарту, тазалау-сырлау, жұмыс жасау тәртібін жаздық кезеңге лайықтап өзгерту жұмыстарына локомотив бригадалары мен депоның басқа да қызметкерлері бір адамдай атсалысып, араласты.
Бүгінгі таңда Сексеуіл локомотив пайдалану депосына қарасты телімдерде 39 ТЭ33А сериялы тепловозы мен 1 2ТЭ10У, УТ тепловозы және 4 ТЭМ маневрлік тепловозы бар.
Міндеттелген жұмысты өз межесінде аяқтауға күш салудан бөлек жазғы тасымал маусымына темір тұлпарлардың жарақты болуы бәріне салмақ екенін ұжымның әрбір мүшесі жақсы түсінеді. Комиссиялық байқаудың алдын ала отырысы болып, жоспар бекітілген болатын.
Онда қолынан жөндеу, сырлау сынды жұмыстарға икемді, шебер жігіттер таңдап алынды. Локомотив бригадаларының күшімен 40 тепловоз ішінара, 4 ТЭМ тепловозы толықтай сырланып, жазғы кезеңде жұмыс істеуге сақадай сай дайын етілді.
Локомотив бригадалары тепловоздарды жуып, тазалап, шанағын, жүріс бөлігін тексерді және оларды сырлап, жазғы маусымға дайындады.
Тағы бір мақтанышпен айта кетерлік жайт – біздің телімдегі тепловоздардың басым көпшілігі ТЭ33А сериялы жаңа локомотивтер.
Олар жуып- тазалағаннан жарқырап шыға келеді. Машинистер мен олардың көмекшілері әрбір тапсырылған істі ұқыпты да тиянақты орындап, әрбір колоннаның машинист нұсқаушылары локомотив бригадаларының уақытпен санаспай дайындық жұмыстарына бір ауыздан атсалысуын ұйымдастырды, – дейді Сексеуіл локомотив пайдалану депосының бастығы Жангелді Түрединов.
Жалпы бүгінде аталған депода 412 адам еңбек етеді. Соның ішінде 140 машинист, 146 машинист көмекшісі бар. Ұжым басшылығы көктемгі байқау кезінде өз еңбектерімен ерекше көзге түскен теміржолшыларды атап өтіп, оларға алғыс білдірді. Атап айтқанда, колонна жұмысын жандандыруға атсалысқан машинист нұсқаушылары – Серік Әзеханов, Ерсұлтан Есеркепов, Қамбар Ахметов, Оңғар Аманжолов, Марал Ахмет сынды локомотившілер мен басқа да локомотив бригадалары өз істерін абыроймен атқарып шыққан.