Дінмұхаммед пойызда дүниеге келді

Тағы бір сәбидің кіндігі пойызда кесілді. 4 маусым күні «Ақтөбе-Ақтау» бағытындағы жолаушылар пойызында шекесі торсықтай ұл бала дүниеге келді.

Ақтөбеден Ақтауға, өз үйіне бара жатқан келіншек жүктіліктің сегізінші айында болған. Толғақ 4 маусым күні таң алдында пойызда отырған кезінде басталады.

Пойыз басшысы Ботагөз Қиданова жетінші вагонда келе жатқан жүкті келіншектің толғатып жатқанын естіген бойдан жолаушылар арасынан дәрігер іздейді. Ана мен баланың бағына орай, акушер әйел кісі көрші вагонда келе жатқан.

Пойыз басшылығы жүкті келіншекті қызметтік купеге ауыстырып, барлық жағдайын жасайды.

«Әр станция сайын жедел жәрдем қызметін шақырып, ана мен бала денсаулығының қалыпты екендігіне көз жеткізіп отырдық. Себебі жүкті келіншек жолшыбай станциядан түсіріп алуға қарсы болды, неде болса Ақтауға жетіп алуға тәуекел етті. Абырой болғанда еш қиындықсыз жеңіл босанып, шамамен күндізгі сағат 11 шамасында келіншек ұлын бауырына басты. Жолаушылардың арасында акушер болғанына қуандық. Қалай болғанда да әр істі өз маманы жасаған дұрыс», – дейді пойыз бастығы Ботагөз Қиданова.

Ақтөбеден Ақтауға қарай бағыт алған жеке пойызда жолаушылар 100 пайыз толық болған.

Бұл пойыз басшысының жаңа қызметтегі бірінші сапары екен. Бұл қуаныш пен сәттілікті пойыз басшысы құттылыққа балады. Теміржол саласында 14 жылдан аса еңбек ететін Ботагөздің өзі үш баланың анасы. Бір қызығы, осыған дейін жолсерік болып жүргенде Ботагөз үш келіншекті пойызда босандырып алған екен.

«Демек, тәжірибелі акушер-теміржолшымын. Бәрі де аман-есен босанды, олар қыз бала болатын. Жаңа қызметте ұлды болдым», деп әзілдеді. Ендеше, Ботагөзді әріптестері «екінші қызметі акушер», – деп әзілдейтіні де шындық болды дедік.

Жас босанған ана жолдағы станцияда түсіп қалмай, пойыз қызметіне риза болып, діттеген жеріне дейін барған. Ал пойызда дүние есігін ашқан ұлға ата-анасы Дінмұхаммед деп ат қойған. Қазір ана мен баланың денсаулығы жақсы.