Ақтөбедегі дүлей дауыл зардабы

Ақтөбе облысында қатты жел тұрып, Шұбарқұдық станциясына қарасты теміржол бойына электр бағаналары құлады. Салдарынан «Атырау-Нұр-Сұлтан» бағытындағы жолаушылар пойызы 2 сағат 34 минутқа кідірді. Абырой болғанда адамдар аман. 

Электр бағаналары жүрейін деп тұрған пойыздың алдына құлаған. Оқиға 12 маусым күні таңғы сағат 6:00-де тіркелді.

Найзағай ойнап, қатты соққан желден құлаған төрт бірдей электр бағанасы тоқтап тұрған жүк вагондарының үстіне түсіп, рельсті жауып қалды. Шұбарқұдық станциясының басшысы Алтай Абдуллин сол күнгі оқыс оқиға жайлы баяндап берді.

«Шамамен 15 минуттай уақытқа созылған дүлей дауыл болды. Табиғат құбылысынан болған төтенше жағдайдан жолаушылар пойызы кідіріп қалды. Біздің жұмысымыз – пойызды тоқтатпай, уақытында жіберу, жолаушылар қауіпсіздігін сақтау. Рельс бойында тұрған үлкен төрт темір бағана құлап, жолды жауып тастады. Сол зілдей темірлерді жолдан алып, жолаушы пойызына қауіпсіз сапар туғызғанша, екі сағаттан артық уақыт кетіп қалды. Ауыр темір бағаналарды арнайы қалпына келтіру пойызы келіп, бағаналарды көтеріп алды. Айта кетерлігі, теміржолға зақым келген жоқ. Вагондар сынудан аман», – дейді станция басшысы.

Оқиға орнына 20-дан аса теміржолшы, екі техника және төтенше жағдай қызметінің 10-ға жуық маманы мен екі техникасы жұмылдырылған. Қалпына келтіру пойызы Қандыағаш станциясынан шақыртылды. Қатты жел кезінде теміржолшылар түнгі мезгілде жұмыс жасағанда ыңғайлы болсын деп орнатылған жарық бағаналары да құлаған. Қазіргі күні олар да уақытша қалыпқа келтірілген. Станция басшысы әрі қарайғы жұмыстардың жоспарлы түрде жалғасатынын хабарлады.

«Алдағы уақытта барлық жөндеу жұмыстарын қайтадан жоспарға алатын боламыз. Абырой болғанда анадай үлкен темір құлағанда ол жерде ешкім болған жоқ. Бірінші жолда жүргелі тұрған №47 пойыз машинисі қауіпті уақытында көріп, жылжымалы құрамды тоқтатып үлгерді. Бірден бекет кезекшісіне хабар берген. Бекет кезекшісі сол жерде барлық басшыларға, вокзал кезекшісіне, вагон құраушыға, жолшыға – бәріне бірден хабар беріп, адамдар мен пойыз қауіпсіздігін бақылады», – дейді Алтай Абдуллин.

Ақтөбе облыстық төтенше жағдайлар департаментінің хабарлауынша, қатты жел салдарынан станция аумағында құлаған электр желілерінен кейін барлығы 973 абонемент, 109 мекеме жарықсыз қалған. Сонымен қатар, ауылда 2 қабатты 16 пәтерлік тұрғын үйдің және аудандық аурухана шатырының бір бөлігі ұшып кетті. Қазір жөндеу-қалпына келтіру жұмыстары жүріп, уақытша бағаналар орнатылды. Оқиға орнында теміржол саласының мамандары мен төтенше жағдай қызметі жұмыс жасап жатыр.