Ақтөбеде өртке қарсы қызметінің ұжымы марапатталды
Ақтөбе облысы бойынша меншікті тілші
«ҚТЖ» ҰК» АҚ қарасты мекемелер арасындағы салалық жарыс қорытындысы бойынша Ақтөбе мемлекеттік емес өртке қарсы қызметінің ұжымы үшінші орын алды.
Ақтөбе магистральдық желі бөлімшесіне қарасты мемлекеттік емес өртке қарсы мекемесі 2019 жылы жасаған жұмыстары бойынша бағаланып отыр.
Карантинге байланысты марапаттау сәті кейінге қалдырылған еді.
«Ұжым еңбегінің бағаланғанына қуаныштымыз. Биылғы жылдың екі тоқсанында, 3 және 2 орынның сыйақысын алып үлгердік. Еңбек еленуі жұмысшыларды жігерлендіреді. Алға қарай ұмтылады. Өрттің алдын алу, профилактикалық жұмыстар, өрт оқиғасы орын алса, дер кезінде ауыздықтауға бар күш-жігерін салып еңбек етуде. Қатардағы жауынгер өрт сөндірушінің еңбегі бағаланғаннан артық құрмет жоқ деп есептеймін. Ұжым биылғы жылдың қорытындысынан да межелі орыннан үмітті», – дейді Ақтөбе мемлекеттік емес өртке қарсы қызметінің бастығы Әділ Құбаев.
Мекемеде еңбек ететін жүзден аса теміржолшы 2000 шақырымға жуық аумақтың қауіпсіздігіне жауапты. Біліктілігімен нәтижелі жұмысты жоғары деңгейде ұйымдастырып отырған мемеке басшысы Әділ Құбаевтың 30 жылдан аса еңбек өтілі бар. Еңбек жолын қатардағы өрт сөндіруші болып бастаған маман – бүгінде үлгілі ұжымның басшысы.
Айтуынша, мекемедегі өрт сөндіру пойызы ескі болса да, жөндеу жұмыстарын уақытылы жасап, шаруашылықтан шашау шығармай отыр.