Жаңғызтөбеден алтын тиелуде

Жолаушылар тасымалы

24.04.2018, 15:36

Оқуға 3 мин

Жарма-Шар телімінің 817,1 шақырымында орын тепкен 3-класты Жаңғызтөбе станциясында жүк тиеу, түсіру шаралары бойынша күтпеген жаңалық орын алды. Алғашқы тоқсанды қорытындылаған жүк тасымалымен айналысатын мамандар бұл оң өзгеріс әлі де тың жетістіктерге жетелейтінін айтады. Бірінші кезекте айта кетсек, алдыңғы жылы аталмыш станция бойынша жүк тиеу ісі 296 вагон, 19 мың тонна болса, бұл көрсеткіш өткен жылы күрт өсіп, 801 пайызға жеткен. Яғни, жүк тиеудегі жетістік 2261 вагонды құрап, 152,8 мың тонна болыпты. Ал енді ағымдағы жылы аталмыш станция жүк тиеуді бұрын-соңды болмаған деңгейге, 7 800 вагон, 526 мың тоннаға жеткізуді жоспарлауда. Оған тапсырыс берушілермен жұмыс нәтижесі ықпал етіп отыр. – Жүк тиеу көрсеткішінің бұлайша еселенуіне өңірдегі «Артель Старателей Горняк» ЖШС-ның өткен жылдың маусым айынан бастап құрамында алтын металы бар сульфидті кен өндіруді қайта жандандыруы болып отыр. Бұл мекеме шахталары 1992 жылы жабылған болатын. Ал енді осынау кен өндірушілер биылғы жылы қарқын алған өндіріс көлемін күрт арттырып, Балқаш станциясына жылына 500 000 тонна кен өнімін жөнелтпек. Бұдан бөлек, Жаңғызтөбеге жақын жатқан Бөке ауылындағы Васильевская кен байыту комбинаты құрамында алтын бар сульфидті кенді Ресейге тасымалдамақ. Жоспар бойынша тасымал көлемі жылына 100 000 тоннаны құрайды, – дейді Семей ЖТ бөлімшесінің өндірістік-техникалық бөлімінің бастығы Гүлнар Төлеуханова. Бір бұл емес, тиелер жүкті еселей түсер тағы бір факті бар. Атап айтсақ, «Алтай минералдары» ЖШС Тарбағатай тауының етегіндегі Маңырақ кен орнынан Ресейдің Алтай өлкесіндегі Серпухово және Кульшарипово станцияларына бентонитті топырақ жөнелтпек. Жоспар көлемі жылына 200 000 тоннаны құрап отыр. Сонымен қатар, биылдан бастап 2018-2022 жылдарға жоспарланған республикалық маңыздағы Қалбатау-Майқапшағай автокөлік жолы мемлекеттік «Нұрлы жол» бағдарламасы аясында күрделі жөндеуден өткізілмек. Қытай шекарасына апаратын бұл тас жолдың ұзындығы 415 шақырымды құрайды. Оның құрылысына арналған темір-бетон бұйымдары мен асфальт битумы, металл конструкциялар мен т.б. қажетті заттар Жаңғызтөбе станциясынан түсірілмек. Себебі, Қалбатау кенті аталмыш станциядан небары 28 км жерде ғана. Бұл ретте «ҚазАвтоЖол» мекемесі құрылыс материалдары мен техникаларын тасымалдау жөнінде келісім жасасып жатыр. Жаңғызтөбе станциясының бастығы Азамат Нұрғалиевтің айтуынша, жүк тасымалының бұлайша күрт өсуі аталмыш станцияға қосымша жұмыс орындарын ашу мүмкіндігін туғызған. Бұрындары, оңтайластыру кезінде қысқартылған пойыз құрастырушылары қызметке қайта алынуда. Сондай-ақ, қажетсіз деп танылған, бос жатқан бәзбір кірме жолдарда ендігі аралықта жүк тиеген жылжымалы құрамдар жүрісі жанданып, теміржол тіршілігі қайта жандануда. Ал, Семей ЖТ бөлімшесі басшылары тасымал бойынша қызметі күрт жанданған Жаңғызтөбенің кластық дәрежесі жоғарылайтынын айтады. Тек ол үшін екі жыл мерзім керек көрінеді. Қалай десекте, күре жолдың бойындағы Жаңғызтөбенің дәуірі қайта туғаны анық.

Жаңғызтөбеден алтын тиелуде

Басқа да жаңалықтар

Қазір оқылуда

Қазақстан теміржолшысы газеті, №81 13 қазан 2026 жыл