Атырауда жүк тасымалы артқан

Атырау жүк тасымалы бөлімшесі бойынша биылғы жылдың сегіз айында техникалық жоспарға сай негізгі 12 көрсеткіш 100 пайыздан аса орындалған. Яғни, пайдаланым жүк айналымы 6298,1 млн т-км нетто болып, 101,3% құрады. Жүк тиеу көлемі 6682,7 мың тоннаға жетіп, орындалуы 103,5% көрсетті. Қысқасы, 14 пайдаланым көрсеткіші орындалған. Межеге жетпей қалғаны бір-екі көрсеткіш...

 Пайдаланым жүк айналымымен қоса, жұмыс вагонының айналымы, жергілікті вагон айналымы, жүк вагонының өнімділігі, вагонның орташа тәуліктік жүрісі, вагонның статистикалық салмағы, пойыздың орташа салмағы, жоспарға сай орындалуы аймақта жүк тасымалы көлемінің сегіз айда жоғарылағанын көрсетеді. Сондай-ақ, локомотив жүрісі, пойыздың учаскелік жылдамдығы, пойыздар қозғалысының техникалық жылдамдығы, вагонның бір жүк операциясына тұруы жүзден асыра орындауынан өңірде тасымал тасқыны ойдағыдай екенін байқауға болады.

Ал енді директорлар кеңесі жоспары бойынша қарасақ, пайдаланым жүк айналымы 6298,1млн т-км нетто болып, 101,6% құрады. Жүк тиеу көлемі 6882,7 мың тонна болып, орындалуы 102,4 пайыз болды, сол секілді негізгі басқа көрсеткіштер де жоғары. СД бойынша 14 пайдаланым көрсеткіші орындалған. Межеге жетпей қалғаны – бір техникалық станцияда вагон тұруының орташа ұзақтығы 99,2 пайыз болып, 0,8 пайызға төмендеген. Оның негізгі себебі – тасталған пойыздардың тұру сағатының өсуінен. Атырау жүк тасымалы бөлімшесінің техникалық бөлім бастығы Темірхан Аманқұловтың айтуынша, жергілікті вагон айналымының кем болуы вагондардың кеш келіп, жүк түсіру баяу жүргізілгендіктен. Теңдік станциясына бағытталған тасталған бос вагондардың саны өсуінен болған. 8 айда 2843 вагон (35 пойыз) 113047 сағатқа тасталған, олардың орташа тұруы 39,8 сағатты құраған. Оған Теңдік станциясымен қосылатын «РТИ АНПЗ» ЖШС пойыз қабылдау кірме жолдарының бос болмауы, сондайақ Мақат, Құлсары, Сағыз станцияларында транзит вагондардың тұрып қалуы себеп болған.

Техникалық жоспарға сәйкес, жергілікті вагон айналымы 98,9 пайызды құрады. Оның төмендеуіне вагон жүгін баяу түсіру, кірме жолдардың алыстығы, локомотивтерді күтіп қалу, жүк түсіретін алқаптың бос болмауы, кедендік рәсімдерді күту, құжат айналымы, келісім-шарт жасақтау сынды себептерден вагон айналымына әсер еткен. Онда «Теңізшевройл», «Шанхай Конструкш» ЖШС, «Стар», «Халелов» ЖК, «ТНС», «Рауан Налко», «Нұржол транс» ЖШС, «Карат» ЖШС жүктері болған. Екінші мәселе – вагондардың орташа тәуліктік жүрісі. Оның төмендеуіне тиелген вагондарды қабылдаудың кемуі, вагондардың жұмыс паркінің артып кетуі, жалпы вагондар жүрісінің вагон-шақырымы кемуі, т.б. себептер әсер еткен. Ал жүк вагондарының өнімділігіне келсек, 7 айда бұл көрсеткіш 100,1 пайыз болған. Тамыз айында пайдаланым жүк айналымының 26,5 млн т-км неттоға кеміген себебі тиелген вагондар жүрісінің кемуі мен жұмыс паркі вагондарының артуы болып, 99,5 пайызды құраған. Қалған жоспар түгел орындалды. Жалпы, өңірдегі тасымал тасқыны жарты жылда жақсы деңгейде келе жатыр. Вагонның статистикалық салмағы 54,24 тн-вагон болып, 101,1 пайызды құрады. Жүк вагонының орташа салмағы 3957 тонна брутто немесе 100,7% құраған.

Айта кетерлігі, бөлімше бойынша ағымдағы жылы мемлекеттік «Нұрлы-Жол» бағдарламасын жүзеге асыру үшін Атырау-Астрахань, Атырау-Ақтөбе бағыттары бойынша жол-құрылыс жұмыстарына инертті және құрылыс жүктері аса көп көлемде келіп жатыр. Ондай жүктер Махамбет, Аққыстау, Ганюшкино, Жамансор, Сағыз, т.б. станцияларда арта түскен.