Қазалыда екі бірдей тәжірибелі жолшысы зейнеткерлікке шықты
Қызылорда облысы бойынша меншікті тілшісі
Бар ғұмырын теміржол саласына арнаған сала еңбеккерін зейнет демалысына құрметтеп шығарып салу – теміржолшылар ұжымында дәстүрге айналған шара. Қазалы жол дистанциясының екі бірдей тәжірибелі жолшысы зейнеткерлікке шықты.
Дистанция бастығы Аманкелді Құсанов пен кәсіподақ ұйымының төрағасы Дастан Әбішевтің ұйымдастыруымен екі жолшыға лайықты құрмет көрсетіп, сый-сыяпатпен шығарып салды. Жол жөндеушілер Қуандық Сарманов пен Тұрар Аяпов ұзақ жылдар осы дистанцияның «отымен кіріп, күлімен шығып» дегендей еңбегі сіңген жандар. Басшылық қос ардагерге адал еңбегі үшін алғыс айтып, олардың өткен өмір жолы мен тәжірибесін жастарға үлгі етті.
– Теміржолшы деген атқа лайық жұмыс жасап, әріптестеріне үлгі бола білген Қуандық Сарманов пен Тұрар Аяпов біздің ұжымның мақтанышына айналған майталмандар екенін бәріміз жақсы білеміз. Ендігі жерде ұзақ жылғы бейнетінің зейнетін көруіне тілектеспіз. Ал өндірісті ол кісілердің орнын басқан шәкірттері абыроймен жалғастыра береді деп сенеміз, – деген дистанция бастығы қос ардагердің иығына қазақы дәстүрмен шапан жауып құрмет көрсетті.
Телім бастығы Әбсағат Құттымырзаев пен жасанды құрылыс шебері Нүркен Қарабалаев сөз алып, бір емес, бірнеше буын жолшыларды тәрбиелеп өсірген қос тәлімгердің еңбегі ерен екенін жеткізді. Әріптестерінің ықыласына риза болған Қуандық Сарманов пен Тұрар Аяпов алғыстарын айтып, алдағы уақытта ұжымның жетістігіне сырттай тілекші болып, қолдап отыратындарын жеткізді.
Сонымен қатар, осы шара барысында 4, 5,10,11 және 12 өндірістік телім жолшыларымен кездесу өткізген басшылық олардың жұмыс жағдайларымен танысып, пікірлерін тыңдады.