Малдың темір жолға шығуы тиылмай тұр
Маңғыстау облысы бойынша меншікті тілші
Сай-Өтес станциясының темір жолдарына малдың шығуы жиілеп кеткен. Соның салдарынан жыл басынан бері көптеген ірі қара мал пойыз астына түскен.
Осыған байланысты теміржолшылар мен желілік полиция өкілдері халқының басым бөлігі мал өсіретін Жармыш ауылында болды. Олар шаруа қожалықтарының иелері және ауыл тұрғындарымен кездесіп, профилактикалық түсіндірме жұмыстарын жүргізді. Іс-шара 9-11 қараша аралығында өтіп жатқан «Құқықтық тәртіп» жедел жұмыстары аясында ұйымдастырылды.
– Темір жол – қауіпті аймақ. Соған қарамастан темір жолдың бөлінген жолағында мал жаю фактілері азаймай тұр. Жыл басынан бері Сай-Өтес станциясындағы көлік полициясының қызмет көрсету аумағында 28 мал басу оқиғасы тіркелді. Оның 21-нің иесін анықтап, әкімшілік шараға тарттық. Былтыр да 28 дерек тіркелген еді. Биыл сол көрсеткіш қайталанып отыр. Тұрғындармен кездесіп, түсіндіру жұмыстарын жүргізіп келеміз. Бірақ, нәтиже болмай отыр, – дейді Сай-Өтес станциясындағы желілік полиция бөлімінің бастығы Нұрлыбек Рахметов.
Оның айтуынша, ҚР 2001 жылғы 8 желтоқсандағы «Теміржол көлігі туралы» және басқа да теміржол көлігіндегі нормативтік-құқықтық актілерге сәйкес қоршалмаған учаскеде малды темір жолдан 300 метр қашықтықта, ал темір жолдан 200 метр қашықтықта үнемі қадағалаумен бағуға ғана рұқсат етіледі. Темір жолдың бөлінген жолағында мал жаю қағидасын бұзғандар ҚР ӘҚБтК-нің 559-бабының 1-бөлігіне сәйкес әкімшілік жазаға тартылып, айыппұл төлемек.