ҚТЖ-ға қарасты кәсіпорындар көктемгі байқауға дайындалуда
«Қазақстан теміржолшысы» газетінің тілшісі
Қыстың қарлы бораны мен аязды күндері артта қалды. Алда жаз маусымына дайындық, көктемгі комиссиялық байқау өткізу науқаны тұр. Бүгінде ҚТЖ мен оған қарасты барлық филиалдар, еншілес кәсіпорындар мен шаруашылықтар үстіміздегі жылдың 10 сәуірінде басталатын көктемгі байқауға қызу дайындық үстінде.
Магистральдық желі дирекциясының Техникалық даму департаментінің директоры Әнуар Амантаевтың айтуынша, көктемгі және күзгі байқаулар 2020 жылдың 30 наурызында №193-ЦЗ бекіткен және Компания басшылығының тапсырмасына сәйкес «ҚТЖ» ҰК» АҚ бөлімшелері мен оның еншілес ұйымдарының дайындығын ұйымдастыру стандарты аясында 2023 жылдың 20 наурызы мен 5 мамыры аралығында магистральдық теміржол желілері нысандарын көктемгі байқаудан өткізу қарастырылған. Ресми түрде 10 сәуірде бастау алатын көктемгі байқау 31 мамырға дейін жалғаспақ. Оның себебі ел өңірлеріндегі климаттық жағдай мен ауа-райына байланысты болып отыр. Десе де, көктем ерте шыққан өңірлер бүгінде көктемгі байқауды бастап та кеткен.
– Қазіргі таңда магистральдық желі бөлімшелері тарапынан бұйрықтар шығарылып, шаруашылықтарды комиссиялық тексеру кестелері бекітілген. Көктемгі тексеріс барысында шаруашылықтардың жазғы тасымалға дайындығына, ғимараттар, инфрақұрылым, құрылғылар, сондай-ақ алдағы 2023-2024 жылдардың жылу маусымына қазандықтар, жылу трассаларының жай-күйіне ерекше назар бөлінеді. Ақаулықтар анықталса, оны жаз бойы жөндеу, жою, қалыпқа келтіру жұмыстары жүргізіледі. Жалпы, көктемгі тексеру барысында анықталған ескертулер шаруашылықтар мен кадрларды қысқы жұмысқа дайындау бойынша іс-шаралар жоспарын жасау кезінде ескерілетін болады, – деді департамент басшысы.