Малдың теміржол бойына шығып кету жағдайы азаймай тұр
Маңғыстау облысы бойынша меншікті тілші
Жолға малдың шығып кету мәселесі өзектілігін жоймай отыр. Теміржолшылардың жылдағы жырына айналған бұл түйткілді шешетін қандай жолдар бар? Оған халық не дейді, күнкөріс үшін өсіріп отырған малының арам қатқаны тұрғындарға да жақсы болмаса керек?!
Мәселен, биыл жыл басынан бері Маңғыстау жол дистанциясы аумағында сегіз малды пойыз басыпты. Демек, бұл пойыздардың жолдан шығып кету қаупімен сонша рет бетпе-бет келді дегені. Мамандардың айтуынша, төрт түліктің ішіндегі терісі қалың жануарды соққан пойыздың жолдан шығып кету қаупі де жоғары болатын көрінеді. Ондай жағдайда бүкіл бір құрам аударылып, арты қандай өкінішке ұрындырары мүмкін екенін тұрғындармен кездесулерде үзбей айтып келе жатқанын жеткізді. Малға қарсы қоршауларды да жылда салып, жаңартып жатқанын алға тартады. Маңғыстау жол дистанциясы бойынша биыл 10-11 бекеттер, Шетпе ст.-13-бекет, 12-13 бекет, 12-11 бекет аралықтарының оң және сол жағына 88,7 шақырым жаңадан қоршау құрылыс жұмыстары жүргізілуде екен. Құрылыс жұмыстарын жыл соңына дейін бітіру жоспарланған.
– Осы жылы теміржолдағы шұғыл тежеу берулер көбейіп кетті. Өткен сегіз айда 148 жағдай тіркеліп, былтырғы салыстырмалы мерзімдегіден 31 дерекке артты. Соның салдарынан 7,40 тонна дизельдік отын шығын болды. 8 мал пойыздың астына түсті. Бұл мал Бастау – Ақбөбек бекеттері, Өзен ст. – Бастау, 10-11 бекет, 11-12 бекет, 12-13 бекет, Қарақия ст. – Жетібай ст., 14-15 бекет, Ақбөбек бекеті – Бопай ст. аралықтарында кездескен. Содан бір жағдайда ғана малдың кімдікі екені анықталмады. Қалғанында иесі табылып, ҚР Әкімшілік құқық бұзушылық туралы Кодексінің 30-тарау 559-бабы 1-бөлігіне сәйкес ескерту беріліп, айыппұл салынды. Сондай жағдайлардың алдын алу жұмыстарын түрлі деңгейде өткізіп жатырмыз. Қазірге дейін жеті жүзден астам адамға түсінік жүргіздік. Мал иелеріне түсіндіріп, арнайы бақташы ұйымдастыруға аудан әкімдіктеріне хат жолдадық. Желілік полиция бөлімшесі және ауыл әкімшілігі қызметкерлерімен бірлесе теміржолға жақын Боздақ, Батыр, Баянды, Емір ауылдарында болып, тұрғындармен кездестік, – дейді Маңғыстау жол дистанциясының жетекші жол инженері Ержан Артықбаев.